King barikun ming bale, karin ya paynawa
Sasagap yang angin, ing malugud ming Tata
Bangkitung dutung, tungkud king lele na
Kwaku nang babasuk, bisyo nang dadala
Kabang lalawen ke, anti ya mong Ari
Bala nang salita, alang bisang pakli
Maglaang parusa, kareng magkamali
Disiplinang mana, pinasa ning laji
Ing kekaming Tata, dimut pegaralan
Pero ing amanu, pantas yang matimbang
Likas na siguru, keng dayang pibatan
Deng aliwang tau, bibie lang paggalang
Akakit mi naman, lugud na kang Ima
Eke makaramdam, kapurit mu mang mua
Pane ing lambingan, ni e la magsawa
Bista man kalulu, mayaman king tula
Taiktik king suluk, malagad gamitan
Kekaming penganak, atakman mi na ngan
Buring e na talnan, king lande misalang
Masakit man king lub, ikami barugan
Paswit maski mayna, agad kang lumapit
Pag emu pensinan, itas ing taiktik
Dapot panakut mu, ni e man magamit
Ban ing kimut mi, misaneng mabilis
Pag meko yang abak, nang oras mang datang
Kuanan ing gamat na, mamag-mano ke ngan
Kareng mang makatua, ‘ting mipaindalan
Idake karela, ustung pamanggalang
Pag oras sisilim, kailangang mitipun
Arapan ing altar, pangading idaun
Kaibat mig-rosario, karen ke pa mapun
Salamat milabas, iting patingapun
Oras ning pamangan, pamilya kumpletu
Bayu ke sumubu, mangadi ke pa mu
Ing grasyang pigkalub, pasalamatang ustu
Nanu mang miapag, kumaniamang piu
Tata mi ala ne, ala ala nyamu
Meging bie mi kaya, dakal ke atantu
Late mi king buldit, aral ming atutu
Diptan naman iti, balu ming lugud mu
Bangkitu’t kwaku, kwayang taiktik
Agaganaka mi ya, pag ilang akakit
E nasang gamitan, mitanam king isip
Kareng maging suli, ipasang ‘gang binit
Malagad na yata, o biglang mewala?
Menga-kalingwan na, tradisyun kanita
Aliwa mung uring, pamag-disiplina
Ya mang pamamarug, bawal ing daptan pa.
