Ing bie na ning tau keti king masala,
King lablab ning sulu api yang mistula;
Misan, ken mung tiup na ning angin a maina
King panimanman mu kabud nia mu matda;
At.. mengari mu keng metung a kandila,
A mapupupud mung kagnan ning keyang lua.
Antimo’ing sintingan, ing bikas at lagu
Ating aldo datang iti kumupas mu;
Kabas namu naman ning metung a baru,
Miras itang aldo maging basan nia mu;
Uling alang bage king tau mituldu
A e miangganan pablasang yang tutu.
Samyu ding pelalung mabanglung bulaklak,
Mabating na potang akua rang mapanat;
Antimurin keta ing sari king tindag
Datang ing penandit milako ya tikas.
Uling ilug ya mang asna king kalualas,
Ing angganan niti ya kabud ing dagat.
Upaya’t sikanan, limpak a salapi
Nung atilu keka, mie kang anting Ari;
Dapot e apihung ing katas mu bilii,
E na magbayu pa ing sadia mung uri;
Misan kasi ing bie tanggapan mu’t ali
Dagpa nung insanu itang e ta’ buri!
Uli mong mikalma kang meging makualta
E mu no’ balu ring kayabe mung sadia?
At saka balamu potang maniabi ka,
Ika itang pekamayap dili keta;
Ing bie keting yatu ganakan mu sana,
Ating kayangganan ing egana-gana.
Nanung ulaga ning tipun mung pibandian
Nung potang mate ka malakuan mu misan?
Yan, keti mu sulip maki-kabaldugan
At ala nang kwenta king Kayang arapan;
Ing mayap at marok a kekang depatan,
Yang karin masuri king tune timbangan.
Mate ya ing tau… pakatandanan mu,
Alang bie malakuan nune ing dapat mu;
Nung meging ganid ka at ugaling lilu,
Dakal lang tumula king pangamate mu!
Kabang king mayap at maki-Apung Ginu,
Kapurian ing keya pisabian ding tau.
Mate ya ing tau… bisa ka’t e bisa,
Kapaktung ning oras a keya mitakda;
At uling alang bie binie nang Bathala,
A e mirin’ sepu lalam Nang upaya,
Ing nanu mang bage keti king masala
Ating kapupusan a e ta’ asagka!
King penibatan mu a mababang gabun
A keta dilpak mung makabang panaun,
Ken at ken karin marimlang tulandung
Potang baywan na ka ning Ginung Minyaklung!
Nung nu’ Na ka dimput…dininan bie napun,
Karin na ka ibalik – miuman maki-agum!
