Alus e pa memitna man ing Aring Aldo kanita
King malaut a baltangan a tituk ning Dios keya,
Kabud-abud anti waring tinakap king keyang lupa
Itang kule abung biga a magpaitas babo banua;
At keta ing kalalaman a mandilu king aslag na,
Kilubutan ning mitakup a silim keng oras a ita.
Meging pisak ing marangle a sadia nang buburan
Karing makule nang yata neng masayang kayabakan;
At ing kaugtuan ning aldo a sadiang kapali-palian
Migmistula yang antimong bengi waring kapitangan;
At nu’ kambe na ning patak nitang tikatik a uran
Abu’t balas itang dagpa king gabun a makalantang
At alus mamilatan mung pilan minutu ing ayun
A e mu apulung ukdung pepagalgal na ing gabun,
Inya naman indat iti sapuluyut midadapitun
Pelalung bakal a pusu ikua niting apa-ugun;
Uling pati e man sadiang biasang maus king Miniaklung
Kanita re aganaka at kilait susun-susun!
At niang sikan itang uran a’yanti waring bubulus,
Penandit mu, linapo no’ danum ding sapa at ilug;
A keta ing paniatang na nitang masalusung agus
A mabilis tutulandung, kukuldas ibat king bunduk,
Iti, e man kinabukas, agisan no’ ngang pepalbug
Ding balen a makasigi, a’yanti mo ing Baculud.
E la ditak ding memalen a sinintang na pagkabie
Niting bulkan a kabud na migising king panga-imle;
Pilan a ektaryang gabun itang karin king marangle
A bigla nang mitambunan king lahar a sinagese?
Nung nu’ pati damulag ding ortelanu mengamate
A kitkut na king balas a migit pa king apulung pie?
At keta ring mirasan king sengilan ning Pinatubu
A’yantimo ring king Banlic at ding karin Tete Gugu,
Deti, king mesabing lahar a mabilis mananabu
Mikutkut lang lampas pa king pitung dobling kalas-salu;
Ding makalto king kolehiyo ning Don Bosco, 3rd floor niamu,
Niang kaibat ning bagyung Mameng a peka-mas grabing lalu.
Ninu tang’ e mitakutan, king balita e masindak
Nung ngara pati kongkretung tete ikua nang apatad
Nitang masalusung danum – a maki kayabe burak –
A’yantimo ing Abacan, king bistaman asne tatag,
Iti e ya minaguanta aniang akua rang mayagas
Ding pundasyun ning mingatba a melukib niting asias.
Dakal la ring mengalasak, at e la dalan at tete
Detang mengatibag karing king ilug makabalebe;
Uling pelalu katibe kongkretung pibale-bale
Dela na ning masalusung agus aniang matibag ne;
At nu’ pati kabiayan da ampon aliwa pang bage
Menyud bigla at ala nang mitagan pang masalese.
Danup at matinding puyat ampon kelan salilungan
Itang lalung mekarindi karing biktima ning Bulkan;
Inia naman ing gubyernu penintun nang kapaldanan
A nung makananung deti mirinan lang asantungan
Karing evacuation centers a maliaring pagkambilan
Kabang kasagsagan nitang kalamidad a dinatang.
Dapot uling likas karing Kapampangan ing sikan lub
At lubus a pamanalig king upaya ning Mengabus,
King agia mang asna bayat iting dinatang a salut
E ra’ gewa king balayan ing gilutan da’ nia kabud;
Uling bista’t iting lugal malalam ya pangakutkut,
Iti e re’ lubus likuan ding memalen a malugud.
Ngening akabiusan tanang ganap iting sengilan na
Ning bulkan a meminsala e mu keti king Pampanga,
Mangaintulid mu king iti lubus pasalamatan ta’
Kang Jesucristong Mengabus king egana-ganang sala;
Uling magkang iting bage a kekata Na pepagpa
Metung yang paralan banting ing Dios aganaka taya!
