Aku, e king atin kung personal a mua
kening balamu yang malisuas a pusa,
(A e na balu nung nu’ marap ban takla
tabi keng ngara pin manong’ a salita)
Nung inya anti ke waring pekipara
keng pusa ing sikat a “Bida ng Masa,”
Nu’ne buri kia’mu ping tigtigan sana
a kapanamdaman inggil keng planu na.
Antining kanita asabi ku na pin
ing balamu cellular-phone yang ‘dual sim’
At/o pikabaluan ausan tamung ‘roaming’
politician’ agpang karing manga-galing.
Intasang e nia mu paynawa, kesa keng
nung nu’ya mangalap lapitan, alelen
Ban tagal pati na keng aliwang balen,
antining king Congress (meka-atlu neng term?)
At ngeni pin oyan, agpang keng balita
ing Angeles city yang imbut nang akua
King gamat ning meto’ mayap mangasiwa
ampon ‘World Class City Mayor’ niting bansa.
Pero nung talagang imbut nang sumuyu
king balen, obat mo aliwa pin pamu
Ken Porac, a keyang balayan a tutu
ing panikuanan nang pangasiwan rugu?
O kagalang naman, mabasa ya papil
king mismung balen a kebaitan na pin,
Inya iti e ya makatagal karin
agyang kagawad mu keng ‘barangay council?’
Uli nitang magkang kalupa ria naman
ding aliwa tamu pang memanungkulan,
A nung ala la mang depat a karokan
ala la mu namang agawang kayapan?
E ku buring sabyan king dening mi-Tata
a meging Pun-lalawigan ning Pampanga
Kilub ning migit pa king apulung banua,
menakitan la ren ketang panaun da
Keng ‘quarry’ at saka mialiwang proyekto
a pepagawa na ning Capitol mismo,
Pero bakit inyang lukluk ya’y Panlilio,
meragul bigla ing aldo-aldo ingreso?
(At lalu yang meragul a panakitan
Ing probinsya ngening panaun nang ‘Nanay;’
At nu’ ing kanita milyon keng pabulan
patingapun yamu ngening salukuyan.
Inya ninung misip ing alang ‘himala’
a mengapalyari inyang deting adua’ng
mi-Tatang Lapid ding ken mengasiwa
antimong ngara pin bilang peka-Ibpa
Ning probinsya; inya dakal lang sasabi
ing posibling ating milagrung milyari
Kanita – inyasa’t malati mu’ing abli –
kumpara king ala nang mangotong ngeni?
At mekad ing peka-maragul a sangkan
inya mipaburen ing bage makanyan
Pasari ning deti malagad lang datang
keng opisina rang gewa rang pasyalan?
Inya keng biling yan ban e na maulit
ing king Makati na panga-sambut Lapid,
E na’na pagnasan tagal ken Angeles,
uli ning pihu neng sambutan Mayor Ed!
