“Atse,” nganing taung mengutang nung nu’ya
Karin ing tuknangan na ning Kapitana;
Ining kitnan, agad-agad tinikdo ya
At marapal likwan itang pipipyan na.
“Ima, ima” ngana “ating bisang sali
Karing bigak na ning gayndu tamung babi”;
“Asus, asus” nganing Inda “e ku buri
Ing kareng maglolo e byasang mamili;
Myadia ka, panyatang na potang Tata mu
Alang kapilisyan kaya isumbung ku
Ing ika, misan me pa ikit ing tau
Maligaga ka ban papanikan, ngaku”
Tyempung kapanik na ketang oras a ita
Ing mamagal-magal a karelang Tata,
“Ay, mapnamu” nganing Inda, atiu na ka,
“Ing anak mu bisa nya’tang makiasawa!”
“Buwisit” ngana niti king matwang babai,
E na ka sinawang kakatak parati;
Nanung marapat nung e menikwa ngeni
Itang inumang kung patukba nabengi?”
Asus, pamilya la palang sobra kaklak
Dening atupan na ning magtindang darak,
Nung inya uli ning puru la ngang maklak
Ing pakibat deti e mikakatulpak!
Ala lang keliwan karing kapamilya
Ning pisan kung Tikyu a tau Candaba,
Mapagal yang din’tang ibat keng obra na,
Kitnan ne ning misis, “Ot medis-oras ka?”
“Patugut ka Barang keng kaseselus mu
Lalu neng antining asna karanup ku,
Uling kabud pin ing akung apika mu
Miasawang tampaling ing takman mung pihu”
“Sinabi ku na yan karelang miasawa
Pero pinilit da murin ing karela,
Nung inya tampaling itang asopas na
King asawa niti ketang oras a’yta”.
“Wa, agyang sopas mu, sige yapag mu na,
king ba’neng milamnan ing kakung bituka”!
(Aru, o nu’ miras ing pisasabyan da
Dening parehung maklak a miyasawa?)
Inya pin king bie ra nung misan ding pipi
Deti mas malagua lang mikaintindi
King sisenyas na ning ninu man kareti,
Kesa karing ken a masulit kasabi.
(Partikular karing magmaklak-maklakan
A magkukunwaring alang dimdam, dit’man,
Pero nung itinda na ing asagap nyan
Migit kapitna ing e tutu nung misan!)
