LUAL ya’yni, adwa nang aldo ing panayan
Pihu ta’ne namang miuman pagmasusian
Ing masayang aldo’t petsang panga-pundar
Ning pakamalan ta’ng Indung Lalawigan.
Menasa, Oktubre pamu plantsadu na
Ing sablang bage a kailangan isadya;
Muna, nung ring manibala kwenta
King peka-maselan nang dake ning MOKA.
Ating komiti keng nung ninu ring sanak
Karing nominadu a karapat-dapat
Mirinan galal at nanung meging ambag
Deti king Pampanga ban mirinan ‘Awards’.
Ating miayaliwang klasing presentasyun
A kaugne niting mesabing okasyun;
Mupin, ing pintas ken ding aliwang mirun
Baket y Uncle Sam yang parating Timun?
Masasabi kasing Aldo neng Beitan
Ning probinsya iting dapat pagmasusian,
Pero nung insanu ing Amanung Sisuan
Ya ing lalto salimpusa mu nung misan
Umpisa, angga na king lubus mayari
Ing mesabing aldo a pamagmasusi,
Pasalamat ka nung ating magkamali,
A ing Sabing Menan tagkilan de bili.
E tamu lalako maniabi lang Inglis
Nung iti yang dapat salitang magamit;
Pero, keng aldo na niting panga-bait,
Iti, e ta’neman sana ipamalit.
King aldo mesabi nanu ing criteria
A sukat pagbasian ban mipabilang ya
‘As Most Outstanding Kapampangan, ngara
Ing nung misan e man bait ken tagana?
E wari ing paksa ning pamagmasusi
Inggil king Balen at karing keyang Dai?
Nung nu’ ing kultura’t tradisyun ning lipi
Yang nanan ta’na mu e sa’ malumpawi?
Inya anti na ning ing paksang diwa na
Ning pamagmasusi tamu banwa-banwa
Makaparikil king Aldo ning Pampanga,
Ing Salita na ing dapat maging ‘Bida’.
At e ing Salita nang Balagtas at Sam
Ing keng dila na tala-ugit bilang
King programa, at ding mamananggap galal
Ing dapat dang igkas arapan ding dakal?
Nune ing Amanung Sisuan ya ing dapat
Karing dila reti ing kailangan igkas
Antimong bait king kekatamung labwad
A sale ning lugud, ning legwan at tindag.
At nung ing parasan ta’ king Aldo iti,
Inggil keka Balen at king manang Sabi;
Misanmetung tamung manyese kaniti
Ban e matda angga na king bandang tawli!
