TAMA LANG sa ganang akin ang ginawa
ng isang Mayor sa Kalakhang Maynila,
Na ayon sa isyu na napabalita
ay medyo nakanti yata ng bahagya
Ni Bistek ang isang na- entrap na Seng Hua
sa ‘drug bust’ sa QC, na isinagawa
sa Philcoa area at nakasama nga
ang Alkalde sa pag-antabay ng kusa
Sa pag-aresto ng Pulis Quezon City
sa isang ‘expat’ Chinese nationality,
Na nahulian sa dala niyang kotse
Ng shabu, na tinatayang nasa kinse
Milyones ang ‘street value’ ng naturang
droga na nasamsam sa Intsik behong yan;
At kung saan kaya lang siya nasampal
ng city Dad dahil sa kanyang inasal
Na tunay naman ding kawalang respeto
ang di pagpansin sa pag-usisa mismo
ni Mayor, kung kaya nabigwasan nito
ng magkasunod na kanti ang damuho.
Ikaw man bang ito ay di masosora
sa animo’y pambabastos nitong kusa
Kay Mayor Bautista ang di pagsagot nga
Ng Tsino, at lahat parang bale-wala?
Pasalamat nga siya’t ganun lang kagaan
ang natikman niya dito sa’ting bayan,
Kumpara sa lupit na nararansan
sa kanilang bansa ng kaawa-awang
Kababayan natin na napapahamak
kapag nahulian ng kahalintulad
ng kanilang dito dinadala’t sukat,
pero ang parusa ay di kasing-bigat
Ng ipinapataw nila sa kalipi
natin sa Tsina at di na nakauwi
Sa atin, dahil sa kaparehong sanhi
ng naging kaso ng kanilang kalahi
Kung saan dito ay ikinukulong lang
ng gobyerno ang sinumang mahulian
ng bawal na gamot at ibang iligal
na gawain ang di natin kababayan;
Pero kagaya nga ng ating nasabi,
kapag tayo siyang doon ay nahuli
sa bawal na gamot, tiyak ‘death penalty’
kaagad ang hatol ng kanilang korte.
Subalit kapagka’ Intsik ang gumawa
ng ganitong bagay dito sa’ting bansa,
Madalas, kundi man pinatakas kusa;
yan ay naglalaho namang parang bula!
At mayrun din namang idinideport lang
kahit ‘heinous crime’ ang naging kasalanan,
Kaya’t malakas ang loob ng mga iyan
na bale-walain ang kahit anuman.
Kasi nga, tama at mayrun tayong batas
na marapat sundin sa lahat ng oras,
Pero kung sinong itong mga bumalangkas
ay siyang madalas na kusang lumalabag.
At sana huwag namang mauwi sa wala
ang usaping iyan na kung saan tila
si Mayor Bistek ay napintasan yata
ng iba nang dahil sa kanyang ginawa.
Pero kung kami ang siyang tatanungin
ay di kapintasan yan sa ganang amin,
Kundi paghanga ang nakikita natin
Sa katulad niyang marapat purihin!
