Ban ding tuking henerasyun iti lubus dang abalu
Ing lihim a binunga na ning pangabalam nang tutu,
Heneral Douglas McArthur king matibe nang pangaku,
Ing ya agad nang magbalik kambe ring ‘convoy’ nang sugu
Nitang Roosevelt a kanita Presidente da ring Kanu.
Uling nitang makupad la e ra na ikuang atagal
Itang makasindak-sindak a milyari king Bataan,
A nu’ ring aliwang bihag den penabtab da la batal;
Tinipun do’ ring mitagan at dela libutad dalan,
A nu’ manibat Bataan miglakad lang alang tuknang
Angga na king San Fernando, at e bitasang pepakan.
Sunde-sape lang miglakbe lalam ning mapaling aslag
Nitang kaugtuan ning aldo at dimla ning benging pisak;
At ing peka-masangil pang kareti ra pemanyapat,
Balang mibual keng lakaran… potang e ne mitalakad
Ing karelang bayoneta ya ing agad dang itarak
King kalulung alang laban a magkapilit kumusad.
Ding mapilan a mengangas tiniplad ban makatakas
Makalma la nung ing bante e na la akuang arakap;
Uling kabud atuglapan na lang kikimut, kukusad
Iti, alang kapilisian pauranan da lang balas;
At detang e ra na agyung mikiso banting maglakad,
Bayoneta yang mataram king salu ra ing mitarak!
Inya karing meging bihag ding malupit a Hapones
Migit la king limang libu ding mete uling ning sakit,
Berilan da at/o kaya e mikimut, magkapilit,
Kabang deti maglakad lang keng kaminu mangatakid
Papunta king San Fernando… at keni seke rang aplit
Karing bagun da retang tren ban king Capas la midantik.
Oyta ing mapilan dake ning Martsa ning Kamatayan
O ing ‘Death March’ a’inaus da a mibantug king sikluban;
Bistaman mipaid na ing asuk ning gyerang miralan,
Ing kabling ning digma karing parang ampon kabundukan,
Pamalita na mabilug a yatu ing kabayanian
Ding liping kapilan pa man e paysupil kaninu man
At nung waman iting bansa sekupan ne ning Espanya
Kilub ning migit-kumulang king atlung dalan a banua,
Ding anak ning Indungbalen a teya ra kanita pa
Ing sarili rang katawan at at solung bie ra’t inawa,
A’yanti ri Lapu-lapu at bayaning mengauna,
E ra pepaliaryan deti, ding daywan magdatila la.
Inya nanu’t e pin wari kanitang e no’ mingutngut
Ding memalen king masangil dang kekata pamaniakup
Deng Kastilang kekatamu bisang manalipan lubus,
I Jose Rizal, Bonifacio at aliwa pang mibantug
A bayani na ning tibuan inamyam da ing matampus
Ing bie reti king uli ning katimawan deting imbut?
(Mupin uling kanita pa pulitika na ing miniral
Karing mapilan a lider king gubyernu bisang talan,
At masiri namu naman itang pamisasagsagan,
I Gat Andres Bonifacio a lider ning Katipunan,
Malino masasabi king libru ning kasalesayan
King ing pepapate kaya Pilipinu ya mu naman?).
Makanian man ing milyari king tune Kabalen tamu
Ita maluat nang mituklip nung wari sana keng libru;
Ala nang masanting gawan nu’ne itang ika’t aku,
Ila ampon ding aliwa pang tune ka-Pilipinu,
Misanmetung ta’ parasan ban maging matatag ustu
Laban king nanu mang bage makakarok kekatamu.
Sakali king aldo bukas atin pang magnasang dalpak
Karing bunduk tamu’t parang, balen at mabanding siyudad,
Nung makananung ing bie na ning kekang mapuring anak –
JOSE BASCO ABAD SANTOS para king Tibuan nang Labuad,
Makanian dia namang sanang idaun mipmu king sapat
Ding Kabalen a malugud king Indu tang’ Filipinas!*
