MAHIGIT isang taon pa bago ganapin
ang national election dito sa atin
pero ngayon pa lang ay kapansin-pansin
na ang batuhan ng iba’t-ibang dusing
Ang kasalukuyan na nag-aambisyon
at nagnanais na pumalit kay PNoy
‘comes year 2016’ o takdang panahon
na dapat magdaos muli ng election.
Kilala na natin halos kung sino riyan
sa kampo ni PNoy at grupo ni Binay
ang posibleng sa susunod na halalan
ay mamanukin ng bawat partido r’yan.
Aywan lang kung si DILG Mar Roxas
Itong sa panig ng Liberal sasabak,
Bunsod ng pagbaba ng popularidad
Ni Mr. Palengke sa mata ng lahat.
Sanhi nitong aywan kung maituturing
na kapalpakan niya ang di nararating
kaagad ng ating butihing Kalihim
ng DILG ang marapat unahin
Tulad halimbawa nitong kailan lamang
ay nanalasa r’yan sa Kabisayaan
ang bagyong Yolanda na tunay din namang
bago ang biktima ay nasaklolohan
Ng tanggapan nito, at nabigyang tulong,
dilat na ang mata sa uhaw at gutom
ng marami na ni walang maiinom
na ‘potable water’ na dapat irasyon
Kasi, bagama’t may sapat na pagkain
para sa biktima, na padala mandin
nitong ibang mga kapit-bansa natin,
ya’y di naman sa kanila nakarating
Kundi itinambak lang sa isang lugar
hanggang sa nabulok ito nang tuluyan,
sanhi ng di agad pag-asikaso riyan
ng DILG o pamahalaang lokal.
Maliban sa iba pang ipinipintas
ng nakararami laban kay Mar Roxas,
kaya ang Liberal ay talunan tiyak
kung si Mr. Palengke ang isasabak.
Sa kampo ng makiling sa oposisyon,
bumaba ng kaunti ang trust ratings ngayon
ng pambato nila sanhi ng maugong
na kontrobersya sa Makati city hall
Hinggil sa car park building na pinagawa
ng dating Alkalde na si Jejomar nga;
Kung saan ang isyu’t mainit na paksa,
‘overpriced’ umano ang pagkakagawa
Kung kaya posibleng kumita ng husto
si Mr. Binay sa naipagawa nito,
na nasabing car park building (ayon mismo)
kay dating Vice Mayor Ernesto Mercado
Sa Senate hearing nang mag-testify siya
bilang ‘whistle blower,’ (puera sa iba pa,)
na pawang kay VP ay nagsalita na
ng laban tungkol sa nakurakot daw niya
Sa puntong ito ay posibleng dehado
si Binay at Roxas laban sa ibang kampo
na maglulunsad ng ibang kandidato
o higit pa, kaya magsuri ng husto
At piliing mabuti mula sa hanay
ng magsusulputang maaring maglaban,
ang inaakala nating may potential
na kinakailangan nating suportahan
Marami pa namang mga mararangal
na ‘public servant’ ang puedeng pagpilian,
kabilang na r’yan ang ‘world class’ na kabayan
nating si Cong Oca at si Mayor EdPam!
