Kabalen, bistaman medyu malaut pa
Ing alalan – buri kong’ iparas keka
Dening bage-bage kakung obserba
Karing kandidatung lalapit kekata.
Partikular karing re-eleksyunista,
A e ta’ bitasang akapkap kanita
O akakit mu man karing tanggapan da,
Pero ngeni oren keng lungga linual la.
At e pa man, aplit nong’ lilibut deti
Waman ing alalan ken pang Mayo 13,
Kabang kilub na ning atlung banua reti
Keng pangalukluk da e ra gewa iti.
At den pati na ing dapat dang gampanan
Antimong alkalde o kaya konsehal,
Kareti balamu anti r’yang pasyalan
Ing munisipyu keng karelang pangawan.
Kalupa namo ning keni dane Mauli
Ning Pampanga ating maragul a sisti,
Nung nu’ ding konsehal, (aku nang sasabi)
Ala lang regular a session da reti.
Kasi pin malagad pa yata keng kildap
Ning kaleldo itang mitipun lang ganap
Uling ning menasa miutaba mung agad
Ing ‘session’ nung ala lang bilang a sapat
O ‘quorum’ ngara pin ban apisanmetung
Ing nanu mang bage miyapag keng session,
Ordinansa ya man yan o resolusyon
A sukat dumalan keng deliberasyon.
Makananu la mo pin mika-‘quorum’ den
Nung ing session maka-schedule 10:00 a.m.,
Ating datang manga bandang 9:00 o’clock ken
At ating datang a lampas nang ‘eleven?’
At itang dinatang bayu mag-ten o’clock
Karas ning alas dyes mabating neng agad;
Inya rugu itang mitauli keng oras
Ning ‘scheduled session,’ ala neng akapkap.
Suma total nanung maganap a session
Nung den ala lang maigpit a ‘schedule?’
Inya ding anti ren dapat no’ sigurung
Mipalitan kanyang datang a eleksyon.
Total dakal no’man ding gagagad lunsut
Ban ila naman ding akua tang’ asubuk;
Ilako ta’no ring pane sasalikut
At neng aldo sueldu karin la mu lalsut.
Ngaku wari detang inya kanu ngara,
King munisipyu e la pane pupunta,
Uli ning dakal lang maniawad karela
A mialiwang saup… partikular pera.
At ban ala na lang pane pangilagan
Nung inya e la maralas daratang,
Masanting siguru e no’ pa tatagal
Ban mipaynawa na king bage makanyan
A nu’ ila naman ding anting mituru
King makanyan kase pandinan do’ rugu
Ding tau kambe ning karelang pangaku
Ing makasadya lang sumaup, sumuyu;
Inya nanu’t e no’ lapitan ning masa
A sinane reting pamandinan pera?
Inyasa’t nung iti ing pangilagan da,
Masanting na pin ing palitan ta’na la!
