NGAYONG nasampahan na ng kaukulang
sakdal si Napoles sa Sandigangbayan,
marahil may iba pang maituro yan
na nangumisyon din sa ‘pork barrel scam’
Kundi man direktang sila’y nakaharap
ni Janet hinggil sa isyu r’yan ng PDAF,
pero nakinabang din at nakahawak
ng milyones mula sa pinaka-utak
Ng naturang ‘scam’ – na hinihinalang
baka kabilang sa manhik, manaog d’yan
sa Palasyo kaya di makanti man lang
ng basta kung sino ang opisyal na yan
Ikaw man ba itong sumandal sa pader
na katulad nitong isa sa ‘confident’
ni Ate, pero kakampi ka na ni Sir,
makakaya nga bang ikaw ay takutin?
Kung kaya naman ang hindi ka-alyado
na isinasangkot ni Napoles mismo
ay balisa na at di malaman nito
kung saang dako ng daigdig tutungo?
Kung di n’yan makayang sarili’y iligtas
sa pagkakadawit sa isyu ng PDAF,
sanhi ng kanilang pagkadawit sukat
kundi man sila ay direktang kasabwat
Dahilan na rin sa ang pumasok basta
sa anumang bagay na maanomalya
ay tunay naman ding malapit kumbaga
sa sakit ng ulo’t malaking disgrasya
Na kadalasan ay karsel ang hantungan
kapag nasilat at walang matakbuhan
sa oras na sila’y manganib sa isang
grabeng pangyayaring di inaasahan.
Tulad halimbawa nina Bong Revilla,
Juan Ponce Enrile at Jinggoy Estrada,
Na ngayon pa lamang ay nakahanda na
ang pasilidad na paglalagyan nila
Oras na lumabas ang ‘warrant of arrest’
at sila ay agad na ipadarakip,
ng Sandigangbayan o ‘Department of Justice,’
bagama’t sila ay di pa nalilitis.
Di ko sinasabing ang tatlong Senador
ay nagkasala nga yan ng pandarambong,
pero mas malamang sila’y makukulong,
bago ang sarili ay maipagtanggol
At kahit di pa man napapatunayan
na nagkasala yan sa ibinibintang,
bunsod na rin nitong ang asuntong ganyan
ay karaniwan ng di puedeng pyansahan
(Tiyak kalaboso muna itong ‘accused’
sa isang ‘heinous crime,’ kaya walang lusot
ang itinuturong mga nangurakot,
kung mapatunayan na talagang sangkot).
Aywan lang kung lahat ng nasa listahan
ni Napoles o ni Luy ay sabay-sabay
na ipadarakip ng Sandigangbayan,
kahit di malinaw ang pagkasangkot n’yan
Dala ng posibleng sila’y idinawit
nga lamang nitong si Janet Lim-Napoles
upang ang DOJ ay kanyang mapilit
na payagan siyang maging ‘star witness’
Pero ano pa man ang kahahantungan
ng imbestigasyon sa nasabing ‘scam,’
huwag nawang ang grabeng kasinungalingan
ang manaig, kundi ang katotohanan!
