KUNG BAKIT higit ang bilang ng mahirap
na napatay sanhi nitong ‘illegal drugs’
kaysa maykaya at sagana sa lahat;
ya’y dahil walang maperang nagtutulak
Ikaw man bang ito na kumikita na
sa ganyang negosyo at ibang ‘sidelines’ pa
hahangarin mo pa bang makisawsaw ka
sa patagong pangangalakal ng droga?
Na kagaya nitong sinasabing sangkot
sa bultuhang tulak ng bawal na gamot,
na sina Espinosa at Parajinog
na pareho manding mayor (na natigok).
Ang isyu hinggil sa kampanya ni Digong
laban sa droga na naging mitsa nitong
sabi ay ‘extra judicial killings’ ngayon;
yan sa ganang aking maling akusasyon.
Pagkat hindi nga tayo nakatitiyak
na ‘yan ay gawa ng alagad ng batas,
dahilan na rin sa posibleng ang utak
ay sindikato rin nitong ‘illegal drugs’.
At upang ika nga’y di na makakanta
itong mga ‘courier’ ng nasabing droga
na bistado na sa aktibidad nila,
‘pinatatahimik’ mismo ng kasangga.
Ang ‘riding-in-tandem’ na ngayo’y laganap
ay posibleng di rin alagad ng batas
ang nasa likod ng pagpatay at sukat,
kundi ng kapwa ring ang negosyo’y tulak
(Maari din namang kung si Juan ay galit
kay Pedro, madali niyang maipaligpit
sa pamamaraang ‘EJK’; at pulis
ang suspek at di ang ‘gun for hire’ na ‘culprit’.
Sa palagay kaya nitong kay Duterte,
na palaging kontra ay makabubuti
sa administrasyon ang laging sinasabi
ng isang senador na dating rebelde?
At anhin na lamang yata ng taong ‘yan
ay mag-aklas laban sa pamahalaan
ang taong-bayan at siya ang ilagay
sa puestong noon pa gustong mahawakan?
Kung sa akala ng senador na ito
ay walang bahid ng pagka-terorismo
a/o ng ‘sedition’ ang pagkilos nito
laban kay Digong ay mali si Antonio.
At kung saan para niyang itinutulak
si Duterte para sa isang marahas
‘but a lawful action’ at karapatdapat
ideklara niya ano pa mang oras.
At ‘yan ang sa isip ng mga kalaban
ay di kayang gawin nitong Malakanyang
kasi ang akala ‘unconstitutional’
at di naayon sa prosesong legal?
Kahit tayo ay di maalam sa batas
ating masasabi na may legalidad
itong kay Pangulo gustong ipatupad
na kautusan sa buong Pilipinas
Na rebulusyonaryong pamamahala
kapag di naglubay itong sa akala
nila ay di alam ni Digong ang tama
na marapat ipairal sa’ting bansa.
Ngayong ang kagaya r’yan ni Trillanes
at iba pa tila sadyang ninanais
nilang si Duterte’y mamatay sa inis
upang sa Palasyo sila ang pumalit?!
