Ano ba naman at di pa man talaga
Sumapit ang takdang araw ng umpisa
Ng pangangampanya ng mga lokal na
Kandidato, pero may mga ‘showboat’ na
Silang nag-iikot sa barangay nila
Kahit alas sais pa lang ng umaga?
At batid man nilang Marso beinte nuebe
Ang takdang araw na talagang pupuede
Nang mangampanya ang para sa Alkalde,
Vice Mayor, Konsehal at Representante,
Gobernador, Vice Gob at Board Member pati,
Ano’t di mahintay ang petsang nasabi?
Bago isagawa kung ano ang dapat
Ikilos nang wala silang nilalabag
Na ‘ruling’ o mga panuntunang batas;
Nang di magkagasta ng wala sa oras
Na kaiikot sa ating komunidad,
Para sa akala ay ika-aangat
Ng kandidatura laban sa kabila
Nitong sa maghapon ay nagngangangawa;
At di na naisip na ang mapapala
Ay pagkainis ngalang at upasala;
Ngayo’t komo sila ay hindi sinisita
Yan kahit bawal ay nilalabag kusa?
Pagkat batid na ngang sa abeinte nuebe
Nitong buwan ng Marso hanggang Mayo onse
Ang pangangampanya sa mga botante,
Na itinakda r’yan ng Comelec bale
Para sa eleksyon nitong Mayo trese,
Ano’t bale-wala lang sa mga dyaske?
Aywan naman dito sa ating Comelec
Na bagama’t sila ay ‘capacitated’
Para ipairal itong ‘lawful effect’
Ng ‘electioneering against all candidates,
Ay di magawa ng mga ‘commissioners’
Na makastigo yan o ma-‘eliminate’
O baka naman yan ay nakatatanggap
Ng biyaya mula sa kampo ng lahat
Nitong political parties na maagap
Dumukot sa bulsa ano pa mang oras,
Kung kaya kahit na malinaw at dilat
Ang mga mata n’yan ay mistulang bulag?
Aywan din kung alam ni Sixto Brillantes,
Na humigit-kumulang ‘sa eighty five percent’
Itong ‘violators’ sa mga ‘candidates’
In so far as the rules and other mandated
Regulation of his office is the subject,
But how many of them (to date) have been expelled?
At kayo naman pong aming mararangal,
Mababait pati at kagalang-galang,
Na nagnanais na maglingkod sa bayan
Ano ang sa inyo aming maasahan,
Ngayong di pa man ay kayo’y lumulustay
Ng napakalaking kuwarta sa halalan?
Saang kamay ng Diyos ninyo babawiin
Ang di lamang ‘thousands’ na naging gastusin
Sa ganyang estilo kundi sa kuwarta rin
Ng pamahalaan kung saka-sakaling
Ang kandidatura ninyo ay palaring
Maipanalo sa eleksyong darating?
Kasi nga kung yan ay sahod n’yo lamang
Sa panahong inyong ipanunungkulan,
Iaasang lubos para mabawi yan,
Langit at lupa ang agwat kung titingnan;
Kaya suma total, anong kahantungan
Kundi ng corruption at grabeng nakawan?!
