SUBIC, Zambales – Patay ang presidente ng Magdalena Homes subdivision, samantalang ang asawa nito ay nasa kritikal na kalagayan bunga ng tinamong tama ng bala sa katawan nang tambangan sila ng hindi pa kilalang suspek sakay ang motorsiklo sa Barangay Sto. Tomas dito.
Kinilala ng pulisya ang biktimang si Jaime Castillo na nagtamo ng ibat-ibang tama ng bala sa katawan, samantalang ang asawa nitong si Lamonza Victoria ay sumasailalim sa maselang operasyon dahil din sa tama ng bala sa katawan.
Ayon kay Reynado Sandoval, driver, papauwi na sila kasama ang mag-asawa sakay ang Starex van na may plakang RHX-270 at pagsapit sa kanto ng Barangay Sto. Tomas ng paulanan sila ng bala ng suspek.
Nabatid pa sa ulat na ito na ang pangalawang insidente ng pagtambang sa magasawa sa nasabing lugar, may tatlong taon na ang nakalilipas.
Narekober sa pinangyarihan ng krimen ang siyam na basyo ng bala ng kalibre 45 na ginamit sa pananambang.
Ayaw naman magbigay ng anumang pahayag ang mga tindero at tindera sa talipapa na malapit sa pinangyarihan ng krimen at ang sinasabi ay tumakas ang suspek sa direksyon patungo ng Lungsod ng Olongapo.
