MALISWAS NO naman ding kakandidatu
a aplit luluyun karing balang baryu
uli ning nasa rang mipuk la king puwestu,
papakit nong’ gilas keng pamagserbisyu;
e mu ring ngeni ken manungkulan tamu
nun’e pati na ring gugusal a bayu.
Ding mealang kalma ketang mengalabas
king karelang laban, e la pa minatras
bista’t man kanita, tikman da ing kaplas
atiu la pa mu rin, ba’ lang makiliwas
karing makapuestung alang balak kuldas,
banting ila namang maki-alkas-alkas.
Inia ngeni pamu magumpisa na la
ban deting memalen akwa ro simpatya;
ating magpa-’ feeding program’ king iskuela,
libring unipormi ampon pamag-’zumba’
“medical mission” at miyayaliwa pa
a diskarti kaniang pamamulitika
Neng ating papalad, agiang pasalikut
karing pitaka ra tambing lang babagut;
ating mamye premyu karetang sasambut
a paterakan dang magaling kumembut,
at nung misan atin pang manumang bingut
agiang musingan la at misna kabantut.
Atin mengitatag miyaliwang grupu
a kayantabe ra king pamag-serbisyu;
ila ring mamrisyun at mamye panulu
karetang daralo karing campusantu
lakuas na pin karing maidad nang tau
a mangarismia king, pali at malilyu.
At mekad atin pang magpaliga kanian
‘basketball’ a para karing kayanakan;
libri unipormi, antimurin naman,
alang ‘entrance fee’ at nanu mang bayaran
at karing ‘mineral water’ dang inuman
litratu’t lagyu ra makatatak no’ man.
Ing anggang kayapan papakit da reti
ba rong’ tangkilikan ding balang butanti,
sobra la ganaka at pane pang mayli
ring sadia at bayung memanagal ngeni;
ing galamanu ra matigik parati
a maki-tapik pa, maki-abe ayli.
Ala namang marok king pamangawan da
uling makasaup no’ man karing masa;
ing e mu masanting makasnuk tagana
lalto la mu reti neng mag-alalan na;
kabud sinambut at manungkulan na la,
alino ra man den e ta’na akit pa.
Sana e mu rugu ustung mag-eleksiun
pamagserbisyu at masampat dang layun,
karing sesyon sana dapat lang tumagun
at ketang konseho la magpatingapun,
aliwa itang king bale la magdatun
o kaya karetang “MALLS” la maglimayun.
Kening “social media” kakung ababasá
kapamalakan at mayubu rang nasâ,
mipapanataki la pa ring aliwâ
nung ninu ring atin at alang agawâ;
iniasa’t kabalen ba’tang mitimawâ,
‘Comes May 2019, mabiasa ta’na sâ….
Vhelle V. Garcia
November 21, 2018
Abu Dhabi, UAE
