Maliswas no naman, ding kakandidatu
a aplit luluyun, karing balang baryu
uli ning nasa rang, mipuk la king puwestu
papakit nong gilas, king pamagserbisyu
e mu ring ngeni a, manungkulan tamu
nun e pati na ring, gugusal a bayu
Ding mengasambut, king alalang milabas
king karelang laban, e la pa minatras
bista’t man kanita, tikman da ing kaplas
atiu la pa mu rin, ba lang makiliwas
karing manungkulang, alang balak kuldas
at lumaban karing bisang makipalkas
Inia ngeni pamu, magumpisa na la
ban deting memalen, akwa ro simpatya
ating magpa-feeding program king iskuela
libring unipormi ampon pamag-zumba
“medical mission,” at miyayaliwa pa
a diskarti kaniang, pamamulitika
Neng ating papalad, agiang pasalikut
karing pitaka ra, tambing lang babagut
ating mamye premyu, karetang sasambut
a paterakan dang mayap mamangembut
at neng misan atin pang manumang bingut
agiang musingan la at misna kabantut
Atin mengitatag, miyaliwang grupu
a kayantabe ra, king pamag-serbisyu
atin nang mamrisyun, at mamye panulu
karing balang bale, karing balang baryu
lakuas na pin karing maidad nang tau
a mangarismia king, pali at malilyu
At mekad atin pang, magpaliga kanian
basketball a para, karing kayanakan
libri unipormi, antimurin naman
alang entrance fee at nanu mang bayaran
at karing mineral water dang inuman
litratu’t lagyu ra makatatak no man
Ing anggang kayapan, papakit da reti
ba rong tangkilikan, ding balang butanti
sobra la ganaka, at pane pang mayli
ring sadia at bayung memanagal ngeni
ing galamanu ra, matigik parati
a miki-tapik pa ‘t, miki- abe ayli
Ala namang marok, karing gagawan da
uling makasaup, no man karing masa
ing e mu masanting, makasnuk tagana
lalto la mu reti, neng mag-alalan na
ustung sinambut at manungkulan na la
alino ra man den, e mu na akit pa
E mu sana rugu, ustung mag-eleksiun
pamagserbisyu at masampat dang layun
karing sesyon sana, pane lang tatagun
at ketang konseho, la magpatingapun
aliwa itang king bale la magdatun
o kaya karetang, “MALLS” la maglimayun
Kening “social media” kakung ababasá
kapamalakan at mayubu rang nasâ
mipapanataki la pa ring aliwâ
nung ninu ring atin at alang agawâ
inia pin memalen, ban tang’ mitimawâ
king “GUBYERNUNG KUBIT”! mabiasa ta na sâ….
