I
Kanita atin kung ayalbeng palabas
dikil ya king tau a mapanarampas
masakit yang dakpan mengari yang mong igat
bukud king malyap ya ne pang kataluras
Lupin ing lagyu ning taung mapanako
karas king diskarti e ya saburoro
ditak mung kaluskus king manene galo
a kayang damdaman tambing yang sisigpo
III.
Uling masalusu ing kayang pangimut
e mararakap neng e re asaluput
nung inia ring pulis pati na sundalus
pipiling na la mung gagamus a buntuk
IV.
Pati na tatagal kaniting “detective”
ta no mikakamas king mua manggiligit
pablasang i Lupin, Fujiko at i Jigs
ustung mulai la taganang kulabid
V.
Inia ring anak ku ustung yang alben da
tambing keng iyalis aliwang programa
uling e ku buring apanalben da pa
ing dapat nang Lupin at ding galame na
VI.
Tatakut ku magkang paniatang ning aldo
apusan de ketang kayang pamanako
pota mabiasa la namang mamanako
at ing karelang bie gulping miparoro
VII
King kakung pamalak manalbe la naman
Lupin ding mapilan karing manungkulan
uling ding aliwa megi lang lamiran
e no pepatugut king kapanakawan
VIII
Ing kaban ning balen ing lilimiran da
Ikua rang agisan ing anggang laman na
ala lang tinagan nipnap dang daretsa
pelalung ing latak miras ngan karela
King kapanakawan karin la magaling
at king diskarti ra daig de i Lupin
agiang nanan da la e ro apayamin
karing penako rang pemulsa rang tambing
Detang mapanako e yo pakyapusan
uling masira ing kekayung dangalan
mas mayap no man ding miki-katakawan
ustung kinabsi la tuknang la ring mangan
Dapot detang taung magatal a gamat
king kapanakawan e mu la akawat
at kabang atin lang bage akakapkap
king kaban ning balen ala lang itanglad
XII.
Makarma kayu rin datang ing panaun
ikayu ngang Lupin a linto ganarul
miras man ing aldong mitakpan kong gabun
batik ning lagyu yu sapni yo ring mupul
