ing larung panangab ampon gasolina,
iti, anti waring miguyud kadena
tiki nang mikamal ing hegana-gana,
nung inya ing Balen a sadyang magdusa
lalu pang miragdag ing kasakita’na.
Dakal ing negosyong meparalisadu
daka’lang pabrika ding migbawas tau,
at daka’la namang milaku empleu
king panga-tuknang ding dakal a proyektu,
inya king dane ra ding pakakalulu
lalu lang merakal ding alang trabahu.
Kalulung memalen… E no manakitan
mikamal pa rugu sablang panyaliwan,
makanyan mengalto ing kapanakawan,
holdapan, patayan ampon tulisanan,
matning linaganap ing kaligaligan
inya meging malyap ing katahimikan.
Iyan ing problemang manimunang dili
a sasaingsing na ning Balen ta ngeni,
nung e miyagapan ing lunas kaniti
nung wari keng sakit papunta nang grabi,
nung milala pa yan, malamang malyari
mamungang lalu pang kasiran king tawli.
At nanu naman mo ing maging panulu
keting kalamidad a pang-meto’ yatu?
Ing mumunang dili… Pamagsakripisyu
at pamag-sadya nang mibata ning tau,
kalingwa’na pamu ing luhu at bisyu,
ing sipag at tyaga yang dagdagan tamu.
Ing bisyu ing munang sukat panginlagan
at ing pamigastus king e karampatan,
ing pamipag-intris at pamilamangan
alilan king lugud at pamidamayan,
at agyang nu anti iting kasakitan
ding utus na Dios e la kakalingwan
Ding taung memalen ampon ing Gobyernu
mipanambayuk lang gawa ketang ustu,
ding mangatungkulan e la manabusu
at ding sasakupan e no man manggulu,
deti misaup la ban palto proyektu
king ikasulung na ning kabyayan tamu.
Ing milalung imbut ketang pang-sarili
intris, kasakiman at nasang paybandi
ilele na pamu king panaun ngeni
ing pamidamayan yang sesen parati,
ing pami-lamangan nung yang manatili
ing bayat ning sakit lalu pang titindi.
Lawan yo ring panas a disa’ning albug
mikaul-kau’la ban e la malumud,
ding manuk king tangkal a mipapanuktuk
magisan lang mate king pagal at danup,
inya ring memalen a atyu king maskup
gawan dang timbulan ing pamikalugud.
Inya keting krisis yang gawan panulu
ing sipag, tetagan, ampon sakripisyu,
ilangkap ing tipid king luhu at bisyu
layun panginlagan ing pamamerhwisyu,
sesen ing pamyabe’t ugaling mayubu
at migit king sabla, ing lugud king Ginu.
Diwa nang Jose M. Gallardo
Candaba, Pampanga
