(KASUGLUNG NING MILABAS A ISYU)
KABANG MAGLAKAD kung anting maglimayun
mipasdal ku tulid ning bale maragul;
ikit ku dakal lang taung makatipun
arapan na mismu ning bakal a pasbul;
linele kung bagya at mekiki-mirun
karetang disan kung karin pesitagun
Iti ing bale na ning peka-mabandi
ampon pilantropu a ka-barangay mi,
at malwat na muring e mumuli keti
uling Amerika la mindatun deti;
kayabe neng dintang anak nang lalaki
a ngara metung yang anak a maswerti.
Pablasang ya bugtung a talapagmana
king egana-ganang bage pibandyan da;
at king kuryusidad, neng e ke kilala
melaus kung linub ban akit ke lupa;
king atangalan ku; melunus ku keya
uli na ning tagle a kapansanan na
King bangkung de gulung makalukluk yamu
at itang buntuk na pane neng duruku;
agpang king dimdam ku kanakung abalu,
kigli re pala king talangkang damuku;
dela de states at pekarayu-rayu
king ban panginlag de king matsurang biru.
Ketang asak’syan ku bigla kung minisip
king mabanding anak a pikosu bitis
e ku aramdaman ing nanu mang inggit
kelunusan kepa’t e buring akakit,
inia ing kanakung meging paginakit
karing pengariku bigla ngang mepalis.
Nung makanian pala migit kung mapalad
king kasing-anak kung e makatalakad;
atin ya ping bitis ene man milakad
at e makasulud ultimung tsinelas;
a e ku kalupa agyang nanung oras
king nasa kung puntan malagwa kung miras.
Nanan ko retang mal at bayung sapatus
nung karing bitis ku ali ko’ asulud?
migit ko pang buri ding laun at pudpud
a pigamitan kung king baul selikut
kesa king bili nang pane rang guguyud
king bangkung de gulung kabang bie migapus.
Uli ning makanian a kakung tengalan,
anti kung mipakde’t layun apigunam,
ing aku mas ku pang masuwerti kabilyan
kesa kening anak dening mayakayan;
Wa tutu agyu rang sali agyang pilan,
pero e na no’man asulud deti nan.
Inia nanu’t dapat kung magtampu pala
karing pengari ku ngening ing tutu na,
ala la talagang gaukan karing bulsa
ban isali ra ku karing pengaku ra?
a nung nu’ ku ngeni lubus akilala
ing aku lakwas ku pang mapalad kaya?
Aramdaman ku na king kakung sarili
ing maglakad na kung pauli kekami,
nyang kalbitan na pago ning Kumpare
nang tatang – at nganing kaku na sinabi:
“Mekasali ya ring sapatus y Pare,
karing pengaku na a kapad mung dili!”
Vhelle V. Garcia
December 5, 2013
Abu Dhabi, United Arab Emirates
