I.
Misan da pang petunayan, ding memalen San Fernandu
ing ugali rang marangal at matatag a prinsipyu
ing daya ra ring bayaning bulalag a Fernandinu
kukuri king uyat da at king karelang pangatau
II
i gat Jose Abad Santos, at i Nicolasa Dayrit
parewu lang bayani at San Fernando la mibait
ing karelang katapangan, kabayanian a pepakit
king isip ding Pilipino kapilan man e mawaglit
III
Abad Santos karing Hapon e pepasakmal a batal
uling ing gubyernung puppet keti e ne buring miral
mas pinili na ing mate king kayang pamakipagkal
e ya sana lunto taksil kening balen nang makamal
IV.
At i Nicolasa Dayrit naman ya ing menimuna
memilatan king sigalut da ri Mascardo at Luna
ya mu naman ing lilingap a anti kang tandang sora
karing kawal a sugatan, at masakit a abe ra
V.
Tagle da ring Fernandino ing likas a katapangan
a puli ra kanita pa king karelang pipumpunan
e la matras, lumaban la, libe kaniang kamatayan
karing magnasang dakurak king karelang katuliran
VI.
E mu ketang aspetu na ning milalablab a gera
a nung nu la mekipamuk karing dawyang kasalang da
makanian mu naman ketang larangan ning pulitika
at king likas dang kagiwan a dirinan dang ulaga
VII.
King milabas a alalan lakuas lang meging bulalag
king solidung tagumpe nang Mayora Vilma Caluag
karing apulung konsehal metung man alang mebalag
misanmetung la ring tau e ra la ikwang asalbag
VIII.
Makanian la katatag a prinsipyu ding Fernandinu
a nung wari sa king metal kakabas ne ning aseru
e re basta pagtiwala ing syudad ning San Fernandu
karing e ra kapanalig ban karela mangubyernu
IX.
Luid kayu Fernandino, pupugayan da kayu ngan
metung kayung alimbawa a dapat dang pakyapusan
e mu ring kabalen tamu a kalupang kapampangan
nun e maging ding tau king miyaliwang lalawigan
X.
Pepakit yu ing masabal king pakamalan yung syudad
lakuas kong mitas a balor at metindag a dignidad
nung ika FERNANDINO ka, metung ka karing mapalad
uli ning mulat la isip ketang bage realidad
