1.
Sa’nu pang lugud ing macapaygit caya?
king panga-dalise at panga-dakilâ
a anti ning lugud king ibatang bangsâ
sa’nu pa mong lugud? ala na pin alâ
2.
Ulit-ulitan man a basa’ning isip
at tunggal-tunggal a talastasang pilit
ing bie at amanu a letrang misabit
ning metu catawan iti mayayakit
3.
Capalsintang banal ustung sinibul ca
king tapat a pusu ning ninu’t nanu pa
tau ya man gutad, maluca’t e biasa
magi lang dakila a gagalangan da
4.
Lubus a capurian ing pane pagnasan
king balen, ning tau a miki-dangalan
gumale, dalit at cudtang cawatasan
at ing pagmairing ipasiag neng myuman
5.
Alang maulaga ing e na pigcalub
ning miki-pusung mal king balen kinupcup
daya at pibandian, belwan, pagal, danup
ing bie man acwa ng mangapatlud-patlud
6.
Bakit? sa’nu iting king dagul milalû
a pagcaluban nang casuywan a buû
a migit king sintang malilyaring tutû
at ing bie nang tagle caniti mibubû
7.
Ah! iti, ing indung baleng kecang tibuan
indu a ya cabud tamung agisingan
aslag ning aldo na tutung macagiyam
a minie pali king mabilug catawan
8.
Ing lugud king balen keni ya misanib
at ding sablang bage a mal kening isip
manibat king aldo na ning pangabait
angga na’ing catawan gabun ya magbalic
9.
Carug a maluca’ing king balen miwale
agiang ken mung diwa sacdal na king lumbe
alang gaganacan at pagnasang tune
nun e ‘ing kesapwacan cung balen akit ke
10.
Capagdusan para caniang camatayan
nung para king balen misna king caniaman
migit ya bayat king bage pagmulalan
nung ing ipagcalub caya capalsintan
11.
Nung ing baleng iti manganib yang binâ
at iti cailangan ta yang ipamingwâ
ing anac, asawa, capatad o indâ
king misan nang aus gulutan mong cusâ
12.
Sulung, na pin sulung itamung mabibie
caniting pag-asang sacdal catiwase
ing apala mu man mapait ngang pane
sulung! ban ing dustang balen ibangun ye
13.
Icong kelagasnan bunga at sampaga
ning impun na ning bieng sucat nang linanta
ning sumbagal ampon masapsap a dusa
maniagiwa ya rin king balen malsinta
14
Pagkalub yang lubus lugud a matimyas
cabang ating daya gisanan ngang matac
nung king pamamingwa masintang yang ganap
ing bie, calma iti at gloriang masampat
ANDRES BONIFACIO
November 30, 1863 – May 10,1897
Pag-ibig sa tinubuang lupa
