NUNG LINGAP at lugud king kaparang tau
ing payntunan karing atyu keng gubyernu,
Ala na marahil migit king kayubu
kesa king masabal ning Governor tamu
Karing kaprobinsya, lalu’t karing ala
at magkakasakit king bie rang maluka,
Uling anti la mong mika-kaduang Inda
kang ‘Nanay Baby’ keng lugud na’t ganaka.
Ampon alang nanu pa mang kaplastikan
a ugaling keya ditman e menuman,
Kilub migit atlung banuang neng telanan
ing kapamalan ning Indung Kapampangan.
A nu’ pin meyakit ing ya pamu mekad
ing meging Punlalawigan niting labuad
a mayan lapitan at sasaup agad
karing magdulap keng dalise nang lingap,
Partikular karing alang pilisunan
at alto-lumbug keng sobrang kakaluluan,
Potang mikasakit la at maospital
antining king bulsa ren ala lang gaukan
At nu’ king uli ning kakaluluan deti
Ampon kualtang makailangan pagmantini,
keng panulung sukat saliwan da reti,
imbes kumayap la – nanung malilyari?
Kamaulian deti ( nung e man menasa)
mamate lang e man melawe bitasa
o meulu uling tabletas man ata
kareng ospital ning kapamalan ala?
At nu’ mekad atin mu namang katutuan
ing ngara karas kareng public hospital,
talagang malaut ka kanung mipaldan
uli ning mabuluk a sistema misan
Inia naman ketang misan a pinulung
nala ning kekatang mal a Gobernador,
king ‘executive house mismo ning Capitol
ding medical staff at hospital doctors
A nu’na sinabi ning Gobernadora
karing ‘chiefs of offi ce’ ding labing metung a
‘Capitol-run hospitals’ ing sikapan da
ita sana karing maging pasyenti ra
alang ‘mortality’ (o madidisgrasya?)
At ngana ping Nanay: “E kayu mu kabud
kilub tanggapan yu pane makalukluk,
Nune lawan yu nung nanu pa ing lubus
Agawa ban keta atin kong’ asaup.
Nung deti talagang pakakalulu la
At abitasa yu ing ing tune problema,
Alalayan yu la at turuanan keta
Nung nanung papeles a kailanganan da”.
At dakal pang bage-bage pepalino
Nang Governor karing sablang pesidalo,
Partikular ingil king mesabi babo,
Ban ing tune malasakit mangibabo.
At sana iti nang malagung parasan
Ning pekamasipag a Punlalawigan,
At ngara pin ken ing pekamaganakang
Meging gobernador keti Kapampangan
Mipagkaluban yang bie makaba-kaba
A ipagkalam ning Dios a Mayupaya
Ban sunlag yang lalu katindag a sala
Ing mal tang probinsya busal ding aliwa
Pablasang y ‘Nanay’ kumpara kenu man
A meging asias ning mal tang lalawigan,
Ya pamu mekad ing malingap karen ngan
Karas keng e tamu king aliwa tikman!
