(Kasuglung ning milabas a isyu)
Dapot nanu’t caring
Manalangin a ren mipaintagun rugu,
Ing anting merandam,
Ing king comersyanti at ning contractor mu;
Mitas ing paninda,
Ding dalan at tete ning Banlic at Gugu,
Lesak no’ ning lahar
A keti bigca ning bunduc Pinatubu;
Itang bale na ning
Dinayu king Saudi mitambunan yamu,
Pati na gamit dang
Apundar na niti agiang baldugan mu.
Itang Ortelanu:
A magnasang mupul king cayang asican,
Nanu man ala neng
Icua king tenam nang mitambunan lahar!
Ing panalangin na,
A ing sana iti mupul ya sang’ dacal,
Tone-toneladang
Balas king marangle ing biglang dinatang!
Pati damulag na,
King lautang malualas ala neng apangan,
Uli nitang limbug
Dicut a malabung a carin mirasan!
Itang keta Piun mu,
A magnasang iti mipirmi ne sana,
Ya ing midistinu
Caretang meniud a dike at calsada;
Caring ‘relief centers’,
Nung nu’ ding aliwa ilang sinabac da,
Ilang aldo’t bengi
Cacayud, sasaup manalacad tolda;
Itang panayan na
A ing sana mica-pondung para caya,
Atin pin sang’ din’tang,
Dapot king aliwang ‘project’ pa mipasa!
Kenu panalangin,
King miliaring iti ing miras king Ginu?
Ing king asawa na
Ning meco mig-Saudi o’ing king Ortelanu?
At ing ‘laborer’ mu
A keta manayang miracayan pondu,
Nanu’t king aliwang
Pigastusan ne pa kine ning gubyernu?
Obat ing contractor
A pane gagamal e mu pilan libu
At ing comersyanti,
Ilang mekinabang at ginamal ustu?!
O ing daclat ning bie
Ning tau keti king carinan na ning lua
Talagang macanian?
At nung insanu ken ding lubas king sabla,
Ilang king material
A bage anti nang pagkaitan cusa
Ning mayap a calma
Keti king yatu ning Balun ning Upaya?
O tune catutuan
King itang Camelyu milub yang manawa
King busbus carayum
Kesa king tau keng pasbul nang Bathala?
(Lalu’t caring pane
King kaban ning balen mamagsamantala,
Cabang mangalgal la
At maybug mate keng danup ding aliwa!)
