1.
Sa pahayag ng DTI ay marami ang UMALMA
nang inanunsiyong ang LIMANG DAANG piso ay sapat na
upang may MAPAGSALUHAN ang maliit na pamailya
sa pagsalubong sa pasko sa gabi ng NOCHEBUENA
at ang ganitong pananaw ng nabanggit na AHENSIYA
umani lang ng BATIKOS at maraming nadismaya
2.
Ano ba ang PALAGAY ng DTI sa mga tao
hindi marunong MAGTUOS kung ang gastos ay magkano?
ang nochebuena’y TRADISYON di lamang ng Pilipino
kundi pati ibang BANSA sa ibabaw nitong mundo
lalo ang naniniwala na isinilang ang KRISTO
at dinalaw sa sabsaban niyaong tatlong HARING MAGO
3.
Ano’ng PAKAY ng DTI bakit nila tinutuos?
ang handa sa nochebuena, eh, sila ba ang GAGASTOS ?
ang pakikialam nila’y hindi lamang PAMBABASTOS
kung hindi maituturing na isang PAMBUBUSABOS
lalo na sa MARALITA na sa buhay ay hikakos
na nais ding ipagdiwang ang kaarawan ng DIYOS
4.
Wala na ngang bagong damit ang mga ANAK DALITA
pati sa HAPAG KAINAN dapat pa rin ba’y kawawa?
anong klaseng puso mayron sila upang MASIKMURA?
ang magpahayag ng bagay na hindi NAKATUTUWA
sapagkat ang ganong uri ng mga PANANALITA
sa uri ng pagkatao mayron sila’y hindi AKMA
5.
Kahit ang mga PALABOY na mga batang lansangan
sa tuwing araw ng pasko’y GUMAGAWA ng paraan
upang silang mga sawing-palad sa ating LIPUNAN
makakain ng masarap ang mga HUNGKAG na tiyan
ang oras ng NOCHE buena sa kanilang kaisipan
itinuturing din nilang araw ng KASAGANAAN
6.
Para sa inyo ba’y sapat itong LIMANG DAANG PISO
lalo sa katulad ninyo na KAWANI ng gobyerno?
ang PAMILYA kaya ninyo ay hindi magrereklamo
kung kayo ay WALANG HAMON na pagsasaluhan ninyo?
baka may KESO DE BOLA’t LECHON DE LECHE pa kayo
di tulad sa karaniwang mamamayang PILIPINO
7.
Kung kayo po’y may paggalang sa KULTURA at TRADISYON
na siya nating KINAGISNAN sa matagal ng panahon
ito’y dapat PAGYAMANIN ay hindi dapat mabaon
sa limot, at nararapat PAGTUUNAN ng atensiyon
ang iba nga ay malamang gumagastos pa ng MILYON
lalo na ang mga taong nasasangkot sa KORAPSIYON
