Nung atin metung ken o adua katau
A tune malingap king Salita tamu,
Y EdPam e malakuan kenu man siguru
Pablasang atin yang lugud a masolu
King Amanung Sisuan a sukat maesese
At e dapat pabustan kabud na mate;
Inyasa’t y Mayor sasaup yang pane
Gagambul ban lubus manatiling mabie
At e re akalis king danggut tang’ labi
Lalu’t karing anak pamung mangalati,
Ing Salitang iti ding aliwang lipi,
Kambe ning madalas a pamagmasusi
Karing katatagan a pang-Kapampangan
A nu’ ing Salita a kekatang menan
Ya ing peka-sentru king insa’ mang ukyan
A’yantimo ing merapat a ligligan
Kanitang a-kuatru ya ing bulan a iti
At merapat sakup king Angeles city,
Katalindikingan ni Museo keni,
Arapan na mismu ning ‘City Library’
Crissotan ita ning karin da pilaban
Ding bayung sibul a kawal kawatasan,
Nung nu’ ing paksa ning temang pibadbaran:
“Ninu kayang dapat tamung parsalanan,
Sakali’t mate ya ing Amanung Sisuan;
Ding memalen o ring atyu king tungkulan?”
A pilaban da ring atlung tapuk bilang,
Kaniting mesabing liligan Crissotan.
Kabilang ya karing meging Juradu ra
Ing talasuyu yu, y Doc Tec Tolosa,
At y poestisa Ofring dela Peña;
Nung nu’ pati ‘city mayor’ tinagunan na
Iting Crissotan a kwenta pasimula
Ning Fiestang Kuliat banuaan magagawa,
King Angeles city (kabas ning kang Oca,
A ‘Pyestang Tugak’ o Pista ng Palaka).
At karing tinagun kabilang ya naman
Ing mal a ‘First Lady’ Herminia Pamintuan,
Y Vice Mayor Vicky dinatang ya naman
At y ‘Chief of Staff’ Alex Cauguiran.
Y Mrs. Elinda Cruz ning Holy Angel
Kabilang dia naman ding menatagan ken,
Y Doy Gigante ampo’y Adora Ferrer,
Ilang menibala a tinipun karen
A pesilauk king mesabing Crissotan
At king aliwa pa dikil king tiuntiunan,
Nung nu’ y Roland Malit ya ing timun bilang
At Dalagang Baryu karing miligligan.
At nu’ kambe ding aliwa pang malugud
King Amanu, mapagmalasakit lubus
Ing okasyun a’yting merapat king lungsud
Misna king kasaya at kalugud-lugud.
Inya matulid mu at karapat-dapat
Ing kang mayor EdPam tamu pasalamat
King bage itinan king siyudad merapat
Uling iti anti nang lubus papasyag
King ing suporta na karing talasulat
At poeta banting manatili tindag
Ing Amanung Sisuan ganap nang matupad
Kapamilatan ning pamisuge mayap
Ding memalen at ding atyu king tungkulan
Ban masese ganap ing kulturang menan,
At e itamu ing mitutua nung misan,
Nung mate ya ninung dapat parsalanan?!
