OLONGAPO CITY – Isa na namang lalaki ang nasawi makaraan itong pagbabarilin ng dalawang kalalakihang sakay ng motorsiklo sa Barangay New Cabalan sa lungsod na ito.
Kinilala ang biktimang si Pepito Cruz, 44, residente ng Santol St., Purok 3, Barangay New Cabalan.
Ang biktima ay nagtamo ng tama ng bala sa mukha at dibdib mula sa 9mm pistol ng di nakilalang mga suspek sakay ng single motorcycle.
Ito na ang pangatlong insidente ng pagpatay ng riding-in-tandem sa loob lamang ng dalawang linggo sa kabila ng pinaiiral pang gun ban.
Dahil dito, labis nang nababahala ang mga residente dahil sa kawalan umano ng aksyon ng pamunuan ng pulisya na tugisin ang mga salarin na walang habas sa paggawa ng krimen.
