Ining kalamnan ning kanakung poesya
Tutung milyari kang Apu mi kanita
Inya agyang malwat nang merapat kaya,
Yang kakung ikwentu, ban mipakayli ka.
Kanitang ding usu keng bitis susulud
E la pa sandals o tsinelas a Beachwalk,
Nune kotsu la pa at ampo ping swekus,
Sinake yang bus ing Apu mi keng intud.
Mabie la pa kanita ring La Mallorca
A kabalitan king mabilug Pampanga,
At nu’ ing sekyan na papunta yang Guagua,
Pero karas kanu king Betis kuldas ya.
Kaybat neng kitnan ning kondoktor na ning bus
Nung nu’ munta – kaibat singil dyes sentimus,
Ing kondoktor bayu na ikwang ginulut,
Pidadapitun neng piragling inaus.
At ngana kening mengasdan a kondoktor,
“Iho, karas kabalenan ning Bacolor,
Sabyan mu ne ba’kung e lampas Poblacion,
Uling payndalan ku pamu king San Anton”.
Malagua’t salita, miras ne’ing sekyan na
Tulid palengki ning Bacolor kanita;
Ngana ning Kondoktor, “ Apo, Bacolor na!”
Kagnan ning bigla nang sinabi ing “Para!!!”
Tiknang ne ning Tsuper iting mesabing bus
Tulid ning mesabing palengki Baculud;
Pero nyang kuldas ne – Aba! kabud-abud
Panintunan na la kaparis nang swekus!
“Oy kondoktor” ngana, “nu’mo kebit, abe
Ding swekus ku nanding keng bus ku sinake?”
“Inta wari Apu nukarin mo’ kine?”
“Kening tukuran na nining pasbul, syempre!”
Ya’pang ating ganang mimua keng kondoktor
I Apu mi, uli ning nanan da’la mang lon
Keng estribu ning bus o keng lele pasbul
E ro’ akit agyang nu’la pa manintun.
(Panwalan yu’t ali yu milyari talaga
Kang Apu ming Agang ing anti yan kaya
Kapipiprimeruan nang sinake kanita
Karing pamasadang ‘Bus’ a La Mallorca.
A pekapopular diling ‘Bus Company’
Keti ‘Sentral Luzon’ kadua ing Victory;
Ding Philippine Rabbit – ala nang bibiahe
Tabalu nung nanu ing karen milyari.
Ing Victory namu keti king Pampanga
Ila ning Saulog ding aktibu’t mabie pa
Karing kumpanyang Bus keti mamasada;
Ing Baliwag Transit – yan biglang limbug ya.
At e lumuat pihung king patunggal-tunggal
Metung man kareti ken alang mitagan,
Mabie keng kalsada, keng NLEX daralan,
Kabud ing rilis tren manibat Tutuban
Papunta ken king Clark, ‘operational’ ne
Uli ning bukud king mabilis ing biahe,
E matrapik saka binang komportable,
Ing makasake tren – mura’ing pamasahe!)
