Ining kwentung laman ning kakung poesia
dimdam kia kang Apu ku ketang mabie ya;
Inya agyang medyu laun ne’ing istorya,
busten yung ikwentu ku ing kinwentu na.
Kanitang ding usu king bitis susulud
e la pa sandals o tsinelas a Beachwalk
Nune kotsu la pa ampo kanung suekus,
y’Apu nang Tatang ku sinake yatang bus.
Mabie la pa kanita detang La Mallorca
a kabalitan king mabilug Pampanga
At nu ing sekian na papunta yang Guagua,
pero karas Betis kanu kuldas na ya.
Kaibat neng kitnan ning Kondoktor na ning bus,
nung nu’munta, kaibat singil dyes sentimus,
Deta namang aliwa pang pasaherus
ding pintalan niti bayu ya linukluk.
Pero ngana pala kanining kondoktor:
“Itong karas kabalenan ning Bacolor,
sabian mu ne ba’ kung e lampas Poblacion,
uling taglus ku pamu pala San Anton.”
Malagua’t salita, miras ne ing matua
tulid palengke ning Bacolor kanita;
At nganing Kondoktor, “Apo, Bacolor na!”
kagnan ning bigla nang sinabi ing “Para!!!”
Tiknang ne ning Tsuper niting mesabing bus
ing saken tulid ning palengke Baculud;
Pero kakuldas na nining pasaherus,
Aro, panintunan no’ ring kayang suekus!
“Oy, kondoktor” ngana, obat nukarin la
ding suekus ku keni nyang bayu ku sampa?”
“Numo wari kine Apo nyang sake ka?”
“Kening tukuran ning pasbul, nukarin pa!!!”
Ing Mangumpisal
Bayu mag-maleldo, aisip nang Pisuk
ing magpenitensya’t magpapaku king krus;
Mupin iting balak na e mibalaus
uling mengibabo ing matinding nerbyus;
At keta ing bigla nang aisip kabud,
ing pamangumpisal a e makatakut.
At pablasang bina na nang pitakutan
ing manabu ya pin keng larung bubukal,
Makanyan yang lalung gagad memirapal
ban simba king balen ampon mangumpisal;
Masanting na ngana ing mayagap misan
ban e matitipun ing sala nang dakal.
Karas king pisamban, agad na nang linub
arapan ning altar taimtim mengurus;
Mapilan penandit, saka ya tinaglus
ketang kumpisalan banayad siniklaud;
Kaibat neng kitnan ning Paring atyu kilub,
anti kanini ing entrada nang Pisuk:
“Among” ngana niti, “mangumpisal ku pu”
Mekibat ya ing Pari: “isulit mu, itu;”
“Ing siping ming bale penakawan ke pu”
“Aba, maragul a kasalanan bunsu;
e Ya matula ing keta makapaku,
karing lelangan Nang marinat a pusu!”
“Nanu lang kinwa mu?” ngana niting Pari
“Among, papaya nong Apung Seryung Busi”
“Ding e mu inagtal pilan la pa wari?”
“Manibalang la pu ampon mangalati”
“Ing parusa keka: dapat kang mangadi,
a limang Ibpa mi ampon Bapu Ari!”
“Among, ya mu pu ita? Ala na pu kaibat?”
“Iho, sapat na ita king sala mung depat;
Pero mapa yata, dagdagan mung apat
ban ing kasalanan malaguang makalag;
Detang manibalang balikan mong agad,
at king Sakristan ku malagua mong yatad!”
