I Pisuk at Daisy malwat nong magsyota
Pero den e la pa memasyal bitasa
O menalbe sine ila kabud adwa
Uling ining Pisuk busy ya menasa
At ining babai a girlfriend nang Pisuk
Serbidora neman keng metung a Fastfood
Nung inya misan man e la pa melaus
Linual banting mag-date at keng Motel linub.
Pero pagmulalan na nining babai
Nung bakit i Pisuk sumangid ning iti
Busy ya ngana keng pipagobran niti
Madalas alayu potang yagkat ne’yti.
Misan apilit ne ning Daisy i Pisuk
Ban paynawa la keng motel king Tulauk,
Inyasa’t ikwa ra muring mibalaus
Keng planu da reting keng Motel matudtud.
“Balu mu dear” ngana ning Pisuk kang Daisy,
“Ika pa keng bie ku ing dela ku keti.”
“Uh, manwala ku? Dakal lang sasabi
Ing ika madalas ka keng motel a ini!”
“Ika pa mu pin, eh,” ngana king babai;
“Maglaram ka” nganing pekibat nang Daisy.
“Wa, aminan ku na madalas ku keni,
Pero ika pang girl ing dela ku keti!”
Ay Sta. Romana, Indu na ning Disgrsya
Eya pala tulus ining kargada na,
Nining Pisuk inya nanung kaulyan da
Ngening parehu la mu pala darala?
Glossary: (milupa, parehu, alang pamialiwa)
Magsyota – mibata, mikaburi, mipalsinta
Bitasa – e pa unabis milyari, misan man ali pa
Serbidora – magsilbi kareng pipanganan
Pagmulalan – pagdudan, pagtakan (tegalugan)
Yagkat – tutuki, imbitan, anyahan
Motel – otel a nu’ de saken la misan;
Sumangid – bistaman, o king agya man
Maglaram – maglingad, e tutu sasabyan
Dela – tiki, abe minta, o kaya inagkat
Kaulyan – karasan, kapupuntan sukat
Kargada – darala, bitbit a mabayat
Armas – baril, pana, sundang at lasetas.
(Tomboy ya I Pisuk – Daisy babai ya
Nya nanung posibling malyari karela,
Nun’e ing nung wari keng metung a banda
Reng mosikus ila ring magtompyang ngara).
Misan malilyari king bie tamu bilang
Tau, keting yatu ating e alisyan
A e ta’man buri pero yan daratang
King bistam iti e tamu kaburian.
Ing Dios a linalang king yatu at sabla,
Ating bage-bage makapagmulala;
Inya banting keti mie kang mapayapa
King nanu ing tigtig yang iterak kusa!
