Magpakatatag ka, king angin ning bagyu
Pane kang duduku, ‘yan ing gagawan mu
Bulung mung malabung, pabusteng manabu
Tangkeng menga-sangal, atin ding tumubu
Abe mung dinagul, agnan muring mitas
King tyup a madalas, balamu teterak
Damdam ing langitngit, deng impung milapat
Musikang malambing, lalu na nung abak
Labung kang memerdi, pilan pa mung dangkal
Bisa nang sumilad, ban ika talangan
Uling tyu ka babo, akit na ing lalam
Ni eka magsawa, kareng durungdungan
Gyang babad king danum, titibe kang lakwas
Dakal ka pang usbung, lulsut ditak ditak
Pututan daka man, nokarin ka ibat
Atin nang malili, kapalit mu apat
Pag tebas kang mura, king pamimirapal
Baleng mitalakad, e lumbat king uran
Deng aliwa kasi, mamiling magulang
E maging magapuk, at ali bukbukan
Eko sa magisan, at parakalan pa
‘Tin kong meging dake, king menang kultura
Kareng katutubo, tuknangang gewa da
Pemang-gawang pana, keng kwayang miulma
Armas dang aliwa, tandus a matilus
Pangaras ning bengi, tukil lang babasuk
Kwayan lang kubul, keni la matudtud
Mangabiayang pilmi, king matas a bunduk
Menga-bawas na la, kwayan king paligid
Marakal ng dutung, iya ing akakit
Kunkretung balayan, anging e misingit
Yero la ing bubong, e paud ing gamit
Kwayan kang titikdo, eka paipinsala
Makananu kami, na keka mamasa
Kabilyan mi kasi, bili mung maluka
Ing bale mung kubo, ing agyung agawa
E tamu apigil, ing durut ning yatu
Sobra ng kabiasnan, ning mumusbung siglu
Datang ing panaun, lakwas pang magbayu
Ala ng tanaman, king gabun mitubu
At kabang atin pa, akakit a kwayan
Nung magsilbi sana, dakal pang itanam
Pag iyang abatyo, saya ing adamdam
Ing agaganaka, bie tang milabasan
Sana nung kawangis, ning kwayang makaba
King bagyung bubugnus, e agad miragsa
Uling deng kapiling, anak at asawa
Agyu mang arapan, delubyong mibadya.
