(Kaugne ning Bulan ning Amanung Sisuan,
iting makatuki ya pamung ibie mi para king
malugud yung pamamasa).
NGENING indat miras ing pamagmasusi
King kayaldawan ning Salita ning lipi,
Ala neng timyas at mengari nya wari
King rosang mepanat keng sobra kapali.
At pautik-utik anti reng akmulan
Ding sapni nang Kiko Balagtas at ning Sam,
A ngeni ila ren Indung Capampangan
Ding milulumud ken king keka mi Sisuan.
Kealan lingap da ring lider pambalen
At nu’ anti ra pang pikakarine ren
Ing maki-ambula karing okasyun ken
A makarikil king Sabing sukat banten.
At e buring lumbug keti king masala,
Bista’t kailian da pa mekad ding aliwa
Ing e la patugut ding bait makudta,
Keng kalilinang king mal tamung Salita.
At e ta’ male nung kenu karing atyu
Karing sibabalen a opisyal tamu,
Ampo pa pin karing ken king Kapitolyu
Nung kenu ta’ yalig ing parasan tamu.
Kanita, Mayo pa maus na lang pulung
Ding opisyales a bibu ning Capitol,
A mangasiwa king banuhang okasyun,
At nung nanung gawan ban lunto manayun.
Ating ligligan panyulat kawatasan,
Pamigale poesia, atin mu naman;
At singkagaling keng kantang Capampangan
A bina kalagad ta’nang daramdaman.
Inia naman iting kekatang Amanu
A Sisuan kang Indu, sukat mung itamu
Ing karing kekatang pusu ing isentru,
Neng balang miras ing bulan ning Agosto.
Puwera karing ken a e na sasalanan
Panagkat Ka Orly Manalo king keyang
Ken king San Fernando, bale pipaynawan,
Neng bayu mag-Pasko, parating gagawan.
Pero itang ken king Kapitolyu mismu
A pegumpisan nang Among Ed Panlilio,
Tabalu mupin nung iti pasibayu
A mika tsansa pa karing ngeni atyu?
At karing memalen a makimasabal
King amanung iti, matapat gugusal
Ban e malumpawi ing Sabi tamung mal,
Alang sangkan e ya manatiling sakdal.
Uli ning malagad na la rin laus-lub
Lilinang, king Sabing keng leguan memukud,
Iti makanyan yang ngeni alto-lumbug,
Busal ding salitang English at Tagalug.
Kanita, ken king siyudad San Fernando,
Atin tamung bosis makipagmananu,
Antimong kutnanan, at nu’ kasaup ku
Keng tanggapan ning pun siyudad at turismo.
King Himno ning siyuad aku ing sinulat,
Pero king uli ning pulitika mekad,
Aku, e ku man ken mekilala’t sukat
Antimong ‘lyricist’ na pin niti dapat.
(Oyan, kaibat kung ken gewa ing agyu ku,
Pati kapurit a bibie pakusuelu
Ning pelitan, leko ra na ngan kanaku
(Ing sabla,) puera mu ing libring serbisyu!)
