BULAN ning Agosto, king tauling Biernes na
Tikda re ing Aldo a pamagselebra
King Amanung Sisuan o ing Sabing Mana
Kapamilatan nang Among Ed kanita.
Nung nu’ pin kanita yang Pun-lalawigan
Inya ing AGTACA o mabie Aguman
Din ken Talasulat tamung Capampangan
Ya ing lepitan da ban mipaingkinyan.
Ing kayaduanan da, a mituldung Aldo
Pamagselebra king Sisuan ta’ng Amanu,
Kagnan ning pambansang ‘Buwan ng Wika’ tamu,
King kabilugan a bansang Pilipino.
Mika ordinansa ya ing Kapamalan
Panglalawigan ning kekatang Balayan,
Mupin, king e tamu balung kasangkanan
Nung bakit yan kabud na rugu mituknang.
Tauling selebrasyon o pamagmasusi
Inggil king arte at kultura ning dai,
I ‘Nanay’ ya nang Gob, mesaya saguli;
E melwat, king e ta’ balu mitabili.
At bistaman aku ing Pamuntuk bilang
Ning AGTACA, e ku mapalad kabilang
Ding minugit at/o kayabe tinalan
Karing salapi ken a binye nang ‘Nanay’.
A para gastus king mesabing okasyun,
A kulang mung ditak king kapitnang milyun?
Aku’ng keng ligligan panyulat ing metung
Karing meging juez o tala-panatul.
Subali king bage a kakung simbitla
Ala kung kinargu’t telanan bitasa,
Inya ikua ra mang ken mengsalaula
Ding perang pambalen, e ku sabit, Kaka!
Keng puntong mesabi, a nu’ ing parasan
Ning kekong malukang pamuntuk pa bilang
Ning AGTACA, a maluat na mu namang
Susuyu para king Amanu ta’ng Sisuan,
Yaduan ku pu keka mal ming Gobernador
DENNIS G. PINEDA ing kekong bendisyon
Magprosapuesto kayung kapitnang milyon
Para karing aduang banuhang okasyon.
Den ila ring ‘Aldo ning Amanung Sisuan,’
Mararapat balang ‘last Friday’ ning bulan
Ning Agosto; at ing ‘Pampanga Day’ naman
Balang a onsi ya, ing Disyembre pu yan.
At ban deti e la mabura king isip,
Kabubuslan salu ta’la ren idukit;
Itang agyang e ta’mu katuk dusuldit
Kang ‘Nanay’ at ‘Delta,’ ing mibie mas migit!
Pablasang malugud la naman king Sabing
E ra buring matda ampon manatiling
Mabie busal da ken ding miyaliwa pin
A salita nang Sam, a e ta’ asakwil.
Inya uli niti kaministilan mu
Ing palabungan ing Sisuan ta’ kang Indu
A pamanang Sabi nang Ingkung at Apu
Ban e kumpa danum nung wari keng ulu.
(E sukat kalingwan amanu nang Rizal,
A ing ninuman ken king Sabi nang menan
Ala yang dit’mu mang lugud at pakamal,
Iti migit ya pa keng malansang asan !!!)
