MILABAS ing Pasku at ing Bayung Banua,
pero e ku ikit ing tune diwa na
ning sadia, a nu’ pin i Ninang bayu pa
miras ing kapaskuan mag-Santa Claus ya.
Iti banua-banua, e na sasalanan
antimong regalu king Aldo Beitan
nang Jesus, inia ring ina’nak na bilang
karas na ning Pasku makusuelu la ngan.
(Pero keng milabas a pasku, balamu
menaliwa na ing aske na at banglu
ning napun uli ning iti e kumpletu
karing ina’anak, pablasang alayu.
At nu’ angga na pin king migbayung banua
e ra ne bitasang ikit i Ninang da,
a kanita babie kusuelu karela
indat ing mesabing okasyun miras na).
KANITA kapaktung na pa ning Setyembre,
ing diwa ning Pasku, kekata’ atyu ne,
makaramdam ta’nang magpatigtig pane
musikang pamasku karing siping bale.
At maging itamu antimurin naman,
nung atin ta’ng radio, cassette o nanu mang
‘gadget’ a maliari tamung patigtigan,
ing anti kaniti e ta’ sasalanan.
I’ma e pasaling ‘Christmas tree’ kanita,
nun’e kakua kumu karetang masanga
a liling tanaman libutad ning lauta,
a kakung tatalsak kareng basyung lata.
Babalutan mi’ya mung papil de japon
ing ‘Christmas tree’ karing miayaliwa kulor
a mesabing papil a pangdekorasyun,
king ba’yang sumanting at malagung lalon.
Menasa, ban lunto matikas akakit,
kendi’t pialungan ing menasa sasabit
di Atsi, at (aku) ing pane mangabit
makapadurut a bombilya’ng pam- ‘flashlight’.
Usu no’ kanita pa reng rebentador
a makatinda ken antimong papakbung,
pero e la anti ring makapanahun
a makapangakling ing sikan da akbung
At nu’ e la ditak ding mangadisgrasya
a’yantimo ngeni ning ipasari da,
ring sobra kasikan a mistulang bomba
ing katni ning akbung ding aimbentu ra.
Kabang n’yang minuna ding asasali mi
bala’ sigarilyu la kalati reti,
inia agiang kapakbungan ka kareti,
manasakit ka man e binang matindi.
Salukuyan, medyu dakal na’ing mibayu
king akamulatan karing apu tamu;
kanita dinan na kang beinte sentimu
ning kekang tegawan, asna ka kusuelu.
Ala namu naman ngeni karing anak,
ing karas ning bengi manyiklod lang agad;
kanita – king agiang e me kamag-anak,
karas na ning bengi, sikloran me dapat.
Inia nung e ka’man kayabe mirinan
kang (Ninang) iniang milabas a kapaskuan;
Male mu, pamikit yu aganaka na kang
abutanan limang tia titlu larawan?!
