Nandin, king agia mang e ku balak simba
At malagad ku mung king bisitas munta,
Bigla kung aisip ing panayan da ka
Ban makiagnan kung simbang bengi keka.
Balu ku, pilan nang bengi ing milabas
E ka pa migpalyang linub king bisitas,
Nya makapihu kung king antitang oras
Arapan ming bale pilmi kang lumabas.
E mu pilan ukdu ing belakan ku na
Ing makiagnan dapot, yan mayayaguanta
Uli ning wali mung magdadalagita
A pilming abe mu agiang nu’ ka munta.
Mapilan penandit a pamanaya ku
Abatiawan da kang maglakad dili mu;
Iniasa’t sinulud keng kaisipan ku
King iti, ing peka-masanting a tiempu.
Sangkan kung e male ing ikang daratang
At e ku sasarian ing keka makiagnan,
Nung inia pasimpli kung linual king dalan
Kabud kalabas mu a mapilan takbang.
Sinigam kung bagia king ba’mung apansin
King aku ing kekang akatuki nandin;
Dapot waman aku, belikdan mu ku pin,
Mebilis la katuk ding kekang step-in.
Sukad soga alus ing laut mu kaku
King pamituki tang’ balus a lakad mu,
Nyang libutad dalan kabud namu atyu
Ing asna karagul a maputing asu.
Mipagulisak ka, king agia mang iti
E na ka linelen o keungan niti;
At king pangabigla mu rugu milyari
Ing e mu ukulan kekata malyari!
Milayi kang bigla’t kanaku kinaul
Kabang paparak kang aplit kaniang gabun;
“Tsu” na kang “tsu” kabang e ne man kakaung
Itang tatabi mung Asu’ng asnang dagul.
Ala ne ing Asu, atmu pa katigik
Ing kaul mu kaku ketang e mu malit;
Inya kapakde mu’t pangalino isip
Meninimutla ka king kakung panakit!
E mu ku alawe, dinuku kang bigla
Kabang aku naman pilit da kang yatna;
Inya king makanian tang’ kabilian mutya,
Ikit ding daralan ing milyaring mala.
Kapurit man ala kang maybug asabi,
Nune ing kitang mu anti ya kanini:
“Nung tutu” ngamu, “ing kaku mu sinabi,
Ituki mo bale ding kekang pengari.”
Natural mu sintang mal dili king bie ku
Ing e ku payali, ngening bistung-bistu,
Meyakit, king ika ating lilihim mu
A dalise lugud kalupa ning kaku!
Balu ku, king ika, kaku atin kang mua
A pasari na ning penako kung uma,
Misan a menik kung e ke disan Ima
At ing chaperon mu atyu king kusina.
Inya king milyari nandin, keka’t kaku
Alang munang diling pasalamatan ku,
King pangabistu mung kaluguran mu ku,
Nune itang asna karagul a Asu!
