KAPILAN ma’t bayu miras ing alalan
Dakal lang malisuas karing bisang tagal.
At uli ning alang selan keng makanyan
Maski ninu namu, makitagal-tagal.
Pero nung den kutnan ta’lang tunggal-tunggal
Nung nanung pake ra at tune parasan,
Balu ra mo’ kaya ding mapilan mu man
Itang bage-bage dapat dang gampanan?
Bala’ ring aliwang makiki-alkas mu
Ing pamanungkulan alang sulit rugu;
E ra pa pakibalak ding ken alang balu,
Ing sumambut ya man, mamusbus yang bangku?
Sayang at nung iti e ra naman agyu,
E no’sa makiapus makiki-gagad mu,
Uling iti e mengaring magbebetu,
Karin, a ing belwan den mipapatlalu.
Isipan ding dakal pangsarili kasi
Nung inya mu mekad tatagal la reti;
Bala ra nung agyu rang gumastus deti,
Kabud mu makanyan o asna kasimpli.
Den e ra ukulan itang maging sisti
Potang ila na ring misingko kaniti.
(Karing atyu na ken tanggapan da’t ali
Manintunan la ring aliwa kareti).
Uli ning menasa ding ken ating pera
Mangasikan la lub kabud na lalarga.
Inya karaniwan na namu pin ing ken la
Makipaniñgalma ban lalung mikwalta.
Pablasang muna king sablang bage ngeni
Ing masalapi yang magbabo parati;
Karas keng anti yan, lalu’t sikat ya’yti,
Keng pulitika la ren mag-ala suwerte.
Map a map bibu ka, bukud pa king sikat,
Maragul ing tsansang sumambut ka mekad;
Pero nung ngara mo’ ta’ka lilibutad
King uli ning pera kekang ipangangangas;
Kapamu, misip ka pa rugung banayad
Ban e ka misubu, sumising mataktak,
Uling magkang keka atin mung mitulak
A sadya mung abe, maki-muang mataktak.
Ating kasebyan ken – keka ipasyag ke,
Tabalu mu pin nung iti dimdam mu ne;
Ing metung a tau nung lihim kamwan me,
E na kailangan ing pamarius meng mate.
Ita mung akwa meng asoso makyabe
Yan keng pulitika – aperwisyu mu ne;
At nung masambut ya – ketang e mu male:
King pangalipit na – ANTI MU NENG PETE!
