CANITANG ing Jesucristo mipacu ya
ban tamung micabus king pamicasala,
nanu mo ing meging papil na canita
nitang inaus dang taung palamara?
catacsilan caya itang depatan na
o gulis nang palad a mitacda caya?
CANITANG ing Jesucristo mipacu ya
ban tamung micabus king pamicasala,
nanu mo ing meging papil na canita
nitang inaus dang taung palamara?
catacsilan caya itang depatan na
o gulis nang palad a mitacda caya?
Pauli ning lugud at calam ning Ginu
King icaligtas na king api ning tau,
pigcalub ne niti ban isacripisyu
ing bugtung nang anac a i Jesucristu,
a caring alagad niti mengamanu
“metung kecayu ing cacu magcanulu’..
Ketang Getsemani cabang mangadi ya
i Jesucristu at ding apostoles na
detang saserdotes, carin dinatang la
abe re i Judas at ding sundalus da
at ing daracpan da ba reng akilala
inuma neng Judas ing mamu nang lupa.
Pepailasa ne pin canita i Jesus
caretang gamat ding masangil a Judyus
angga king mipacu at mate ya king Crus
at king casalanan tamu ngan micabus
ing miliaring ita pigsisian nang lubus,
Judas a cayabe caring disipulus
Ing meging papil nang Judas Iscarioti
metung ya caretang maulagang dili
uling yang mepili, ban ganap caniti
at ban itang dapat ya cabud maliari;
iti yang catutuan, uling masasabi
mipamintuan ing lub ning Ginu parati
At uli ning iti yang caya mitacdâ
a maging dake ban matupad ing ulâ,
Ing tutu na nita, bisa ya’t e bisâ
uling yang papil na ala yang agawâ
Inia pin cang Judas, e ta’ dapat mimua,
nu’ne sucat ta’ pang pasalamat atâ?
At nung pacasurian tamung miyamasamas
ing meging papil na tutu yang mabayat
pablasang yang linto a pecamarawac
at contrabida nung wari king palabas;
King gewa na niti a memungang mayap
ken mong pamalac yu tacsil ya pa’y Judas?
Marvel V. Garcia
Abril 8, 2000
Abu Dhabi, U.A.E.
