MIGIT KANINU man karing kapatad mu,
At antining ikang pangane anak ku,
Ikang munang diling panabilinan ku
Karing bage-bage maliaring lakuan ku,
Sakali’t miras na ing tauling aldo ku;
Anak, kaku sana iti’y pangaku mu,
Gampanan mung mayap potang ala na ku,
Ing pelalung anting liyas a sabian ku.
Ika, king bili mu, antimong pangane
Karing kapatad mu ika ing malale;
King anggang tingka ku a malakuan bale,
Ika nang misikap, tangkap masalese;
At sana, kanita… gawan mung matibe
Migit pa king sadia ing kekong pamiabe;
Anak ko… ika na ing ganap mantabe
Potang ati’ na ku ketang aliwang bie.
E mu papaliarian misusunggalit la,
King nanu mang bage a maging problema;
Nung kailangan keta ing mamilatan ka,
E mu na panayan ing silab dagul pa;
King mipmung tetagan ipakit mu sana,
Ing ika agiu meng talanan ing renda;
At sana anak ku… maging parehas ka
King metung at metung neng amanuan mu la.
E mu sa’ pabusten king metung at metung,
Mipapagtampu la’t mipapagmaragul;
Ika, anti na ning ing binie kung tungul,
Ya’ytang nung king bangka ikang maging timun,
Ipakit mu keta king ing kekang tungkul,
Matibe yang buklud king aldo paintungul;
Mangari ka sana king marimlang danum
A ibat king ulu… e matati sibul.
E mo sa’ paburen king benging kaniglan
Ban e la malili king tamak a dalan;
At nung ala muring maragul a sangkan,
Katakap ning silim e mu no’ patipan;
Nung ipilit da ing alang kapupuntan,
Ban e la mitipa ilikid me’ing eran;
Anak ko, sakali’t ating e mipanuan,
E ka pa matudtud… panayan meng datang.
E mo kukusintian king matsurang dapat
Ban e la mitake king marok miyanad;
Yusuk mu karela ing pelalung mayap
A maging gabe ra king aldo ning bukas;
Keta, a nung nu’ ing dalan a masampat
Ya ing talasan dang dit’man alang kanlap;
Karin, a nung nu’ ing kanakung paninap
Anti kung akakit managumpe ganap.
At e mu la naman pakaban a iki
Ban e la mamiasa’t miyungyung king mali;
Supling a miyanad king matsurang gawi
Kasebian, masulit na nang itabili;
Kalupa ning labung ning kuayan, e wari
Asne kayan yungyung king alkus mung buri;
Dapot nung matua ne, tanggapan mu’t ali
Mabunglu ya kabud pinilit meng pikli.
Anak, katataulian a keka sabian ku,
Gawan mu sang’ laus iti king pusu mu;
E mu paimburisan king pamilya tamu
Ing mikakandayu kayu kamate ku;
At nung atin ku mang kamalian kekayu,
Yaduan ku… pota sang’ mitambunan na ku,
Isipan yu namu’t panaplak king lub yu,
Ing ala ninu man a mebie perpektu;
(Pablasang pelalung Alagad ning Guinu,
Mikasala king Dios at kaparang tau!)
