LUNGSOD NG MALOLOS – Nabawi na ng pulisya ang kinarnap na sports utility vehicle (SUV) sa Lungsod ng Meycauayan, Bulacan noong nakaraang linggo kung kailan ay kasama pang tinangay ang isang pamilya ngunit iniwan sa Pampanga.
Nasampahan na rin ng kaso ng pulisya sina Rolando Tablan alyas “Eduardo Fernandez”, “Rolly” at “Rolan”; at si Ronald Santiago alyas “Onad” ng Onad Carjack gang at Dominguez carjack gang.
Ayon kay Chief Inspector Edwin Romero, chief investigator ng Highway Patrol Group Region 3 (HPG-3), nakatanggap sila ng ulat na may inabandonang Isuzu Altera sa kahabaan ng kalsada ng Barangay Calibutbut, Bacolor, Pampanga.
Agad rumesponde and HPG-3 at natukoy na ang inagaw na Isuzu Altera mula kay Jose Hortillosa ng Lungsod ng Meycauyan noong nakaraang linggo.
Sa kabila na iba-ba ang plakang nakakabit sa sasakyan, tumugma naman ang spare key ni Hortillosa.
Ayon sa HPG-3, posibleng tinangay ang SUV at ginamit naman ng mga suspek sa ibang criminal activity bago iniwan.
Ito daw ang istilo ng mga carnapper ngayon dahil sa pumapasok na rin ang mga ito sa ibang krimen katulad ng drugs at robbery.
Nagbabala rin ang pulisya matapos masampahan ng kaso ang mga suspek na sina Tablan at Santiago, dahil sa nakipagsanib pwersa na daw ang mga ito sa Dominguez carjack group.
Ayon sa pulisya, lubhang mapanganib ang nasabing grupo at talagang pumapatay ang mga ito.
Matatandaan na patungo sana sa pagamutan ang mag-anak na Hortillosa noong nakaraang Linggo upang ipa-check up ang buntis na anak ng bigla na lamang may pumarada na bagong Starex van sa harapan nito at may bumabang dalawang kalalakihan na nakasuot ng jacket ng Philippine National Police.
Bigla silang tinutukan ng baril at tinangay ang kaniyang sasakyan kasama ang biktima, asawa at buntis na anak nito.
Tinangay pa mula sa mga biktima ang celfone, alahas at mga dalang cash, samantalang inabandona sila ng mga suspek sa Mexico, Pampanga.
