akit ku pa kaya, ing sala ning abak
dalumdum ning bengi, bayu ku magpiyak
malayang mimisip, ing diwa kung maliap
sana nung balen ku, alang alingasngas.
nunti ya kapali, danum king takuri
pane pisasabian, pondong mengalili
e mu aparimlan, yelo mang ibili
uling deng memalen, pusu da mamapi.
nung sanang atipun, mua king pilubluban
marakal lang boses, mangatning damdaman
panayan ta namu, salbag anting bulkan
ban umeng dagusgus, kareng manungkulan.
dakal sasaingsing, e dapat marapat
mayaman ing bangsa, nung alang mangoryat
‘la atang ahensya, tutung meging tapat
makanian kalala, gobiernung telakad.
bigla nang mewala, tiwala reng tau
pilan lang matinu, deng binotu tamu
mumuna e pa byasa, bayung pulitiku
bagyang miyayawa, anggang nang mitutu.
marakal milabas, meging Presidenti
ngeni sobra karok, iting malaliari
atin ka ping punu, isip na de susi
magpalwal amanu, panwalan o ali.
ninung magtiwala, deng aliwang bangsa?
bugnus puhunan, kaseguruan ala
dating magpautang, mamatras ng kusa
pota perang utang, ‘ting mipitna pitna.
mapalad ing Pinas, atin tamung bunduk
marakal mineral, dagat king palibut
sakahang malualas, ni e ta dumanup
deng aliwang nasyun, king simbitla dimut.
nokarin magkulang, ba’t melakwan tamu?
kalupa tang bangsa, ngeni progresibu
dapat ya bang libyan, uri ning gobiernu?
o kutnan da naka, nang meging dake mu?
