CALUMPIT, Bulacan — Arestado ang tinaguriang killer-rapist ng Calumpit Police dahil sa kaso ng panggagahasa at pagpatay sa pamangkin niyang limang taong gulang na babae sa Barangay San Miguel nitong Martes.
Ang suspek ay kinilalang si Marvin Mengulio y Combenido, 23, residente ng Purok 2, Barangay San Miguel, samantalang ang kanyang biktima ay si Ashley Nicole, 5.
Ayon kay Police Lt. Col. Gerardo Anday, hepe ng Calumpit Police Station, nakita ang bangkay ng biktima na palutang-lutang sa Pampanga River sa bahagi ng Barangay San Miguel.
Agad na nagsagawa ng imbestigasyon ang kapulisan at sa paghahanap ng person of interest ay nakapanayam nila si Mengulio na malaunan ay umamin na ito sa krimen.
Ayon sa ulat, dinala ng suspek ang biktima malapit sa ilog at doon hinalay ngunit nang sumigaw ang biktima ay inihulog ito sa ilog.
Nauna na daw na minolestiya ng suspek ang biktima noong tatlong taong gulang pa lamang ito ngunit hindi na ipinaalam sa mga kinauukulan ang insidente.
Aminado naman si Mengulio sa krimen at sinabing sumisinghot siya ng solvent at dalawang beses na niyang ginawa sa bata ang panggagahasa.
Ang suspek ay nasa kustodiya ng Calumpit PNP na mahaharap sa kasong rape with homicide.
