KAPILAN MAN bayu miras ing alalan
Dakal lang malisuas karing bisang tagal;
At pablasang alang selan keng makanian,
Maski ninu mu ken, makisamal-samal;
Pero nung kutnan mo kayang tunggal-tungal,
Nung bakit at nanu ing kayang parasan…
Balu ra mo kaya ding mapilan mu man
Itang bage-bage sukat dang gampanan?
Bala’ ring aliwang makiki-alkas mu,
Ing pamanungkulan mengari mung biru;
E ra na isipan king ing alang balu,
Mialal ya man magkang mamusbus yang bangku;
Sayang mu, nung tutung e ra naman agiu,
E no’ sa makiapus makikigagad mu;
Karin – a ing beluan da mipapatlalu,
Nanung ibatbat mu nung panugse ka mu?
Isipan ding dakal pangsarili kasi,
Nung inia mu mekad tatagal la reti;
Bala ra nung ta’no linibutad deti,
Kabud mu makanian ing gawan dang pilmi;
E ra na ukulan itang maging sisti,
Potang ila na ing misingko kaniti;
Inia ing resulta na nyan bandang tauli,
Ing kalulung balen yang masasalbahi!
Anti king bili ning metung a Senador
O Representante king metung a rehiyon,
Makananu ya ing e man yaring high school
Sakali’t makarungut ne iti keng sesyon?
At keng kasagsagan ning deliberasyon,
E ya makayatba king nanu mang mosyon,
Uling burian na man keta ing tumutol
E na’asabi nian ing kayang ‘objection?’
Map a map bibu ka bukud pa king sikat
Maragul ing tsansang sumambut ka mekad;
Pero nung kabud ka mu ken lilibutad
Pauli ding perang kekang ipangangas
Abe, ing payul ku, misip kang banayad
Ban e ka misubu, sumising e oras;
Kase, magkang keka atin mung mitulak
A magnasang buri na kang mipahamak!
At yan metung mu pin kaparalanan na
King ba’kang malipit nung dakal ka pera;
O nung alimbawang sikat kang artista,
Magkang buri ing mipakarine ka.
Pablasang muna king sablang bage keta
Ala nang muna keng megaral talaga;
Yang makiki-alkas mu keng pulitika,
Menasa kabiguan mu ing kakamtan da.
Ating kasebian ken, keka ulitan ke
Tabalu mupin nung iti dimdam mu ne;
Yang metung a tau nung lihim kamuan me,
E na kailangan ing pamarius meng mate;
Ita mung akua meng asoso, mekiabe
Kaniang pulitika, aperwisyu mu ne;
At nung masambut ya – yan king e mu male
Keng pangalipit na: ANTI MU NENG PETE!
