King aldo na ning alalan sanakan lang miyamas-amas
Detang anggang kandidatung balu tamung gawang mayap
Lalu na ring bayung sibul a mengangas maglibutad
Bisang sumuyu mu naman king beitan deting labuad
Suryan tamung masalese ing karelang pangatau,
Ing karelang panugali at daralan a prinsipyu
At karetang manungkulan bisang mulit pasibayu
Balu tamu nung ninu ngan ding king balen maserbisyu
Detang anggang alang sibli’t e nebangnan niting balen
E no’ dapat tangkilikan, kailangan nong’ ibalag den’
Detang tapat manungkulan migserbisyu king memalen
Ila retang kandidatu a e dapat mipaburen
At ding bayung kandidatu suryan ta’ lang masalese
Nung nanu pin mo talaga ing karelang tune pake
Uling magkang ding taung den bisa la mung makirake
King kaban na niting balen nanapnapan da nang pane
E mu retang king senado ding masalak miamas-amas
Nune migit king distritu ampon munisipalidad
Uling deti ila kabud ding asahan tang’ lumingap
Karing balen a sakup da ustung ating kalamidad
E la dapat bubotu ring tatagal a mangatako
Alang depat a matinu nune purus pamanako
Antimurin naman detang karing sesyon e papalto
At ding kaibat dang miyalal king bansa no’ mamaglako
Balu tamu nung ninu ngan detang dapat tangkilikan
Mangayap a kandidatung masanting a kapagnasan
Dakal la pa naman den at e ra la mu papansinan
Pablasang king pulitika pera-pera ing labanan
Isilad la deting matang mabubulag karing gintu
Ibusni la ring isipan a malambat nang mipaku
Karing desisyun a mali ketang napun migparuku
Kening balen a mau na king lingap a sadyang tutu
Misanmetung tamung kimut kening banal tamung layun
Ban keta ing mal tang’ balen pasibayu yang mibangun;
King kekatang pamagbotu keng paratang a eleksiyun
E tana sa’ paykamali karing magi tang disisyun!
Vhelle V. Garcia
May 6, 2013
Abu Dhabi, United Arab Emirates
