Manaliwa kata pamung tema keni,
At ipaintulut mung king mana tang’ Sabi
Karin te isulat ing paksang mesabi.
A makaparikil king Aldo Beitan
O panga-tatag ning mal tang lalawigan,
A e tamu sasalanan pagmasusian
Balang a onsi (11) ya ing Disyembre’ng bulan.
At waman anti neng mekalinguan lubus
Karing aliwa ken ing Sabing memukud,
Itamu… a sadiang kaniti malugud
E ta’ya pabusten lumbug namu kabud.
Uling nung insanung sukat magmasakit
Ila pang papalbug king pautik-utik;
Liyus sagipan de’t ganap pagmasakit
Ilang milulumud at papalbug pilit.
Masasabing ating kimutan pambalen,
Nung nu’ kanu ngara sasagipan de ren;
Pero, malbe ka nung nu’la magpulung den
E mu’isipan ating Kapampangan karen.
Misan, ating kaku a mekapanagkat
Ban tagunan itang pulung dang marapat,
Aba, nung e mu pin memigil kung sabat
Penarasti ku la retang maki-tatag!
Obat e ta’sabi ing bage makanian
King karelang paksang malino merandam?
Sasalba re ngara iting lalawigan,
Pero ing Salita reti English naman!
Makapangablad at makaale-ale
King mal tang balayan ing antiting bage;
Baket Capampangan tang masasaglawe,
Kaybat… anti ta’ya waring pikarine?
Antimo pin ing Aldo ning Kapampangan
A makarikil king mal tang’ lalawigan,
Malbe ka’t akit mu ing tune katutuan
A nu’ iti alus e re gagamitan.
Umpisa, angga na king ganap mayari
Ing mesabing aldo a pamagmasusi,
Salamat nung ating mamuge saguli
Ban ing manang Sabi matagkil ya bili.
Masasabing Aldo ne ning Kapampangan
Ing king bulan a iti dapat pagmasusian,
Pero balen, baket ing Amanung Sisuan
E mikakarake king Aldo mung Beitan?
Ante ing lugud ding anak mung makalma
A ngeni mipuk king matas a upaya?
Busten da’nia waring lumbug anting bula
Ing leguan at tindag ning manang Salita?
(Iting kawatasan milimbag ne keng peryodikung Pampanga News king pang-labing siyam a isyu niti, a maki-petsang Disyembre 6-12, 2000. Inulit ne ning maluka yung talasuyu banting upayang maging metung yang masampat a instrumentu para king panyulung at pamangambul nang miuman ning Amanung Sisuan a e ta’ sukat pabusten lubus malumpawi at ganap mabura karing danggut dang dila ding mal tamung kalalawigan, lalu pa’t karing kayanakan, a ngana ping Gat Jose P. Rizal, ila ring kapanayan ning balen king aldo ning bukas).
