Ing ‘Provincial Language Council’ kumusta ne?
Obat kilub na ning pilan banwang wewe,
Ing Pamuntuk niti unabis ali ne
Migparamdam mu man kekaming galame?
A keyang kasaup, gugusal, lilinang
Keng pamangambul mi king Salitang menan,
A nu’ imbes ya ing manimuna kanyan
Ya pang magpatauli nung banayad suryan.
Intasang nung ala neng interes iti
Ban panimunan ing ‘Council’ a mesabi
Obat ing tungkul na bilang Presidenti
E na ibili at kusang magdimiti?
Ban keta milipat ing pamanungkulan
Karing aliwa pa a mangaintuliran,
Antining king CFKS e nia naman
Konektadu iting tau kung amanwan?
At saka agpang king ordinansang sukat
Ipairal lubus at/o ipatupad,
Ing Pamuntuk adwa ya mung banwa dapat
Manungkulan pero yan e ne kinuldas.
Inya anti na ning e nia rin kikimut
At anti nia namang migpabayang lubus,
Karing mangatikdi tamung ‘Provincial Board,’
Yadwan ning AGTACA amyenda de’t resolve
Ing ordinansa rang bibu makarikil
Karing panuntunan ning mesabing ‘Council,’
A nu’ keng ‘Academe’ la mu ring malyaring
Yalal king peka-matas a posisyun pin.
Samantalang karas keng pamipalinang
O pamangambul king Salita tang’ menan,
Keraklan e la man tuklung kalingkingan
Karing talasulat ning Amanung Sisuan
Partkular karing Poeta Laureadu
At agyang karen mung ‘Bayung Suli’ tamu,
Uling deti maka-pagsane lang ustu
Karing tune talasulat ning Amanu.
Nanung abalu mung salitang makatud
King Sabing menan a e ra balung yusuk
Ding “doctorate” a nu’ English mu pin kabud
Ing ‘expertise’ deti o balu rang lubus?
E king mamalatian ta’la ring anti ren
A propesyunal pin sanang dapat tunggen
Pero karas naman king Sabing menan den,
Pilan lamo kaya ring malilyari ken?
Inya para kaku, e king akung bisa
A maging Pamuntuk ning kekatang paksa,
E kaya masanting yabe ta’nong kusa
Keng pamipanalal pati ring aliwa?
Partikular na pin man ding talasulat
At poetang ausan da mu namang Watas
Ban ing Sabing mana kang Indung ta’ ibat
Miuman yang masese, magambul at sukat.
Uling nanu pa mang bage a mesese
Keng dilig, yan agyang tanaman yang bule,
Mamayutputan ya karing keyang ibie
Asna kataba at masustansyang gule.
Makanyan ya naman ing manang Salita
A megambul ustu king didilig kusa,
King pautik-utik lumabung yang sarya
At manyuling dakal – bukas o makadwa!