Ima, king agiamang ngeni ala na ka
kekaming anak mu a malugud keka,
yumu ning lugud mung alang kasimpara
busal ning salu mi yan makakintal pa.
Pablasang antimong malugud ming Ima
keka e mi ikit at dimdam bitasa
ing meslap a lupa o melmura mo sa’
nung ikami atin keng maling agawa.
Nu’ne malumeme yu kaming sabyanan,
a ing sana iti e mi na ulitan;
king makanyan Ima yu kami tiruanan,
at e king palmurang makapanamdaman.
Payntunan mi ngeni ikaming anak mu
ing kaul at uma a sakdal king yumu,
pablasang iti yang kekami tiru mu
a ipamana mi karening Apu mu.
Ima, nung e ke man keka mekayablas
king e mamagkanung pagal ampon puyat
ibat king malati kaming kekong anak,
alananti Ima, kekeng pasalamat.
At Ima, nung buryan na ning Apung Ginu
ing ikayu ampo ing ikaming anak yu,
mibait keng miuman keti babo yatu,
ikang maging Ima mi sang’ pasibayu.
Uli ning e na ke’ makakit pang miuman
a’yanti mo ikang ing lugud na sakdal,
pasalamat king Ginung Miglalang
Ing ika Ima ing Indu ming ibatan!
Metung man kekami a meging suli mu
pante, alang migit ing panlalawe yu,
inia alang bunga na ning pangalalu
a memilatan mo’sana kekatamu.
Iti Ima ya ing alang kasing tibe
babat a penaptas king masayang bie
a matning asabi ming alang kapante
lugud at panirug a kekami mibie.
Inia king agia mang maluat na ka ala,
king katandanan mi e unabis mitda
lablab ing lugud a tenam mung mistula
busal ding pusu mi at maslag a diwa.
At e mupin balang Aldo da ring Ima
o ‘Mothers’ Day’ da kayu agaganaka,
nu’ne king aldoldo, kaslag ning masala
angga king ing pisak – yakmul na’ing sala~
(Alang kayangganan ing lugud ning Indu
Keka o penganak supling nang tinubu;
Iti, katutuan at e pabiru-biru,
Inia iti sukat itanam king pusu!)
