Anak magaral ka,
aldo mung sisilad samantalanan me;
Ekasa paylibang
king abluk ning yatung mapagsubuk king bie.
Gintu la ring oras
ing sabla magbayu ekasa paybande;
Ban e ka sumisi
king pamipasayang potang bandang tauli.
Pakundanganan me
iting kausukan parasan na mayap;
Para keka iti
ipanabilin na malagu mung bukas;
Ban ing pamisip mu
malino nang akit dalan a masampat,
Uling yang kabiasnan
upaya ya king bie, sulu ya at aslag.
King pamagaral mu
magsikap ka sana ampon mibabata;
Ding bage matimbang
bayu mo akamtan masulit talaga.
Akua mung kabiasnan
maulagang banding e mawala keka;
Alikup mung dangal
ning mapuring beluan putung meng korona.
Mabiasa kang misip
pakasamasan mung kilalang katutuan.
Ing galigatsu mu
gawan meng talindo panatang marangal;
Magpaka-tao ka
gawan mu king dapat ing lalung kayapan,
Ban ing bie’t aslag mu
nabangnan dang malda’t tunggen dang Uliran.
Elias H. Martin
Brgy. Pescadores
Candaba, Pampanga
Enero 20, 2003
