GUIGUINTO, Bulacan— Isang Bulakenyo ang nagdisensyo at gumawa ng mga kasulya na isusuot ni Pope Francis sa pagbisita nito sa bansa.
Tatlong kasulya ang nakatakdang gamitin ni Pope na may mga disenyong anahaw atSto. Nino de Cebu, sampaguita at kawayan at isang payak na disenyo ng sampaguita.
Ayon kay Ronald Allan Babaran, designer- tailor ng Disensyo Sagrada ng Barangay Tiaong ng nabanggit na bayan, simple lamang ang mga ginawang kasulya batay sa kagustuhan ng Papa. Ayaw daw kasi nito ng magarbong disenyo kayat ginawa lamang itong simple.
Ang mga disenyo gaya ng kawayan, sampaguita at anahaw ang inilagay upang magsilbing simbolo na dumalaw ang Papa sa Pilipinas. Ayon kay Babaran, natutuwa sila dahil sila ang napiling gumawa ng isusuot na kasulya ni Pope Francis. Isa na rin daw itong blessing dahil sa napakabihira ng ganitong pagkakataon. Samantalang bukod sa tatlong kasulya ni Pope Francis ay sila din ang gumawa ng estola na isusuot ng 2,500 pari sa pagdating ng Papa.
