Maratung malambat, king mapaling aslag
Tatagaktak pawas, papatak king balat
Pane yang pupukpuk, makalyu mung palad
Ikang karpinterung, kinwa ning kapatas
E mu na abilang, telakad mung bale
Pilan nong pamilya, kareti misale
‘Li la kabud gewa, kailangang matibe
Lasaken ne ning bagyu, nung e masalese
Maski nanung dapat, magkulang pa murin
Kapurit a salud, magigisan tambing
Bayad matrikula, atin pang manyingil
Mitigho pa kaya, panayan nung atin
Pag mibakanti, manantabeng aus
Nung parating ala, lupang makalunus
Ali ka misadsad, mamaniad nang saup
O manianlang bage, malwat mang atubus
Pamagkarpinteru, dapat kang mimingat
Lalu nung atyu ka, king pinaka-matas
E ka sa tabili, keng pangakalawat
Ditak mung kamalian, tyak kang manakbag
Lawen me ing bale, ining karpinteru
Bagya mu mamangin, tutuklip ing yeru
Ing pinakalapag, e man sementadu
Ala la mang pasbul, deng maskup a kwartu
Samantalang ika, mayan mung gagawan
Pakasamasnan pa, king emu pibandian
Masuelu yang pusu, nung ika pupuryan
Kauli mu bale, akit ing pilatan
Karpinteru ya sa, pulitikung likluk
Larinan ing sira, ning gobiernung buluk
Mamaluktut namu, king pigkalub salud
Proyektung madapat, alang makurakut
Marangal mung obra, dapat mung tangalan
Dakal mung telakad, king siudad baryu man
Nung aliwa keka, progresu e takman
Iyang maging tanda, ning metung balayan
Malati kang turing, karetang aliwa
Kagiwan mung tinggap, kanini mikalma
Guinung makabalu, tinantus, migtakda
Pasalamat nang lubus, oyning miras keka.
