MEYARI na ing alalan, at ikayung ken mikalmâ
ban magserbisyu king balen, a imbut yung misaplalâ,
ngening iko’ ing aligan ding kekayu migtiwalâ
gampanan yu sanang ustu tungkulan yu at upayâ;
E yo’ sana pikakamuan at e kayu magmaratnâ
karing meging kalaban yu at botanting e yu ikuâ,
yari na ing pulitika, at kalinguan yu na ngan sâ
ing nanu mang e masanting a memaglual a salitâ
Dake na ning pulitika itang mipapamasibas
a mialiwang kapanyiran at amanung mangaparas,
uling maging king pamilya, misan daratang ing oras
mibubungil la mu naman agyang ding mikakapatad
Ding aliwa pa mo kaya a e tugma king pamalak
ding e milaklakan ustung prinsipyu na ing medalpak?
Pekamaulagang dili, ibakut na ing milabas
kekang kulkul a malalam ban mituknang na ing lingasngas.
Sana retang salukuyan, a magobra munisipyu
a keutus ding kekayung ketunggaling pulitiku,
den e yu la bebenggansan at darayu karing pwestu
nung den karapat-dapat la ampon mayap magserbisyu;
Dapot detang mangatako, lamaran at abusadu
a’yalang sawang mangikil karing lulokwan dang tau,
ila ring mumunang dili a dapat panyikaran yu
pablasang ila ring salut a sisira king gubyernu.
Sana isundu yu murin mangasanting a programa
lalu nung ing kapakayan, makakayap karing masa;
antimo ing scholarship a pamie na ning mayora
para kareting magaral, pangdagdag pangmatrikula;
Antimurin ing metung pang dapat dinan yung suporta
ing dikil king kabulasan, pamuntukan nang doktora;
ding adwang bage mesambit, ila ring peka-kaladua
na ning metung a balayan a dapat dinan ulaga.
Makisanmetung la rin sa’ ring kandidatung mesambut
karing bayung manungkulan king tagimpan da at buyut,
at mag-ari karing pusu itang pamikakalugud
at masabal, ban ing balen, misaplala yang tibubus.
Nung atin lang munikala, e ra sana pagkaimut
ipasiag at idake ren karing ngeni pa miluluk,
male tamu ring karelang ideyang makasalikut
king panyulung na ning balen, metung la king makasaup.
Kekong sablang memanyambut king milabas a alalan,
payabut ku ing masampat a puge ampon kapurian;
muna king kagalang-galang a Mayor Jun S. Punsalan,
kang Vice Mayor Leonora Wong, Konsehal Mark Macapagal;
Kang sadiang Vice Mayor Keko, Randell Bondoc, Irene Bagtas,
Dading Santos, Beda, Archie Basilio at Irene Dagdag,
Luid kayu ngan, at luid ya, ing balen ta’ng ngeni tanyag
keng industrya at komersyu, e mu keti Pilipinas.
At iti kapamilatan ding matapat menungkulan
a keti mituki-tuking minugit king kapamalan
lokal ning balen San Simon, iniasa’t e ya melakuan
karing insa’ mang balayan karas keng bage makanyan.
At sana pin lalu yang manianga at mamulaklak
king egana-ganang bage na pa niting ikakayap
lalam dang pamangasiwa ding sadya at bayung salpak
keng puestu ra sukat dang pagmalasakitan ganap.
Kalinguan ta’na pamu ing marinat a pulitika,
at ken ing arapan tamu pamagserbisyu talaga
para king ikasaplala ning balayan – at e para
king binye ming katungkulan, magpakabsi at mikwalta!
Vhelle V. Garcia
May 22, 2019
United Arab Emirates
