Metung a komisyong kakung apansinan
At parating bida nung ing pisasabyan
Karapatan na ning metung a lelangan,
Madadakurak at matatampalasan;
Parehas ya kaya king implementasyun
Pamagmalasakit, pamamaye proteksyun
Karing meyabusung memalen ning nasyun,
A mipamansagan ‘Human Rights Commission?’
Nung mapanyuri ka malaguang asanak
Mesabing komisyun balamu e patas,
Maralas ding keya makinabang sukat
Mangarok a taung kalaban ning batas.
Pulis a tutupad mu king katungkulan
Ilang lalto maki-kasalanan misan,
Nung adisgrasya reng atwag ing kalaban,
Komentu rang agad sirya deng pete yan.
O kaya naman nung atin lang arakap
Mamisaling drogang salut karing anak;
Ing akusasyun da king bulsa ra siksak,
Ding otoridad a karela dinakap.
E wari ding pulis ilang magpatupad
Karing ipairal ning Saligang Batas?
Nanu pa’ta ila ring tune magmatyag
King nanu mang buyut ning kriminalidad
Matulid a sabi ilang instrumentu,
King nanu mang oras akasaup tamu
Ban ing karapatan ning kaparang tau
King imbut niti yang apalto rang pihu.
Ing taung darapat king karumaldumal
Kalupa ding ‘rapist’ ganid a kriminal,
Deti atin la mo kayang karapatan
Gawan ing antiting dapat ding animal?
Inia makanian lang lalung sisikan lub
Uling ning komisyun a kuta ding salut;
Nung alang reklamu ma-‘dismiss’ na kabud
Ing kasu ding sukat king kulungan muluk.
Nung otoridad la ding madidisgrasya
Alang maging aksyon ’ALRIGHT’ mu karela;
Pero karas ketang iti kriminal ya,
HUMAN RIGHTS COMMISSION agad nang suporta.
Mayap pa siguru nung iting Komisyun
Ing dinan nang pansin detang mengakulung
A biktima namu ning pamikatagun
At impluwensya ning maling pamanatul.
Yan mung maglakad ka neng benging tahimik
Kambe ding anak mu at ing kekang misis,
Migaganaka ka uli ning panganib
Kareting holdaper, adik ampon ‘rapist’
O nung alimbawang ing CHR chairman
At ninu mang miyembru ning Komisyun a yan,
Kapamilya da la ring melapastangan
Karing mebanggit a salut ning lipunan;
Pamalak ta’ kaya e la makamate
Nung abalu da la dinapat kanite?
At ing karapatan, proteksyun dang babie
Karetang kriminal miral ya pa ite?
At ninu kaya ing sumaup karela
King pamanugege, pamanimbestiga
King dinapat krimen banting mabalu la,
E wari ding pulis a titirahan da?
Metung ya mu iti karing meging kutang,
Ding pulis a kakung tune kayabyayan;
At uling balu kung bina lang marangal,
Tapat magserbisyu para king balayan,
Ing poesiang ini karela ke’ yampang
At king makamal a Chairman ning CHR!!!
Vhelle V. Garcia
Abu Dhabi, United Arab Emirates
November 21, 2011
